نۇرسۇلتان نازاربايەۆ: «Nur Otan» پارتياسى - ەلىمىزدەگى باستى ساياسي كۇش
جيىندا ەلباسى «Nur Otan» پارتياسى ەلىمىزدەگى باستى ساياسي كۇش ەكەنىن اتاپ ءوتتى.
- پارتيا ءاردايىم تۇتاس قوعامنىڭ مۇددەسىن قورعاپ، تاۋەلسىزدىگىمىز بەن مەملەكەتتىلىگىمىزدى ساقتاۋعا اتسالىسىپ كەلدى. ءبىز زور تابىستارعا بىرگە قول جەتكىزدىك. ەڭ باستىسى قازاقستاننىڭ ودان ءارى دامۋىنا بەرىك نەگىز قالاندى. وسى جۇيەلى جۇمىستى جالعاستىرۋ ماڭىزدى، - دەدى قازاقستاننىڭ تۇڭعىش پرەزيدەنتى.
نۇرسۇلتان نازاربايەۆ سەزدىڭ تاريحي مانىنە توقتالىپ، قاسىم-جومارت توقايەۆتى «Nur Otan» پارتياسىنىڭ ءتوراعاسى ەتىپ سايلاۋ تۋرالى ۇسىنىسىن پارتيالاستارى قولدايتىنىنا سەنىم ءبىلدىردى.
- كەيىنگى ءبىر جارىم جىل ىشىندە پارتيا جۇيەلى تۇردە قايتا جاڭعىردى. ونى تولىق باسقارۋدى قازىرگى مەملەكەت باسشىسى قاسىم-جومارت كەمەل ۇلى توقايەۆقا تاپسىرۋ بۇل پروتسەستىڭ سوڭعى كەزەڭى دەپ سانايمىن. پارتيادان پرەزيدەنت سايلاۋىنا ۇسىنىلعان جانە قولداۋىنا يە بولعان ادام ونى باسقارۋعا ءتيىس. بۇگىندە قازاقستان پرەزيدەنتىنىڭ باسشىلىعىمەن ماڭىزدى الەۋمەتتىك-ەكونوميكالىق جانە ساياسي رەفورمالار جۇزەگە اسۋدا. بارلىق قاجەتتى رەسۋرسى بار «Nur Otan» پارتياسى ولاردى ورىنداۋ بارىسىندا سەنىمدى تىرەك بولۋى كەرەك، - دەدى ەلباسى.
قازاقستاننىڭ تۇڭعىش پرەزيدەنتى جۇرتشىلىق جان-جاقتى قولداعاندا عانا ەل تاۋەلسىزدىگىن نىعايتۋعا باعىتتالعان اۋقىمدى رەفورمالاردان ماڭىزدى ناتيجەلەر بولاتىنىن ايتتى.
- ەل بىرلىگى، تىنىشتىق، تۇراقتىلىق پەن كەلىسىم باردا ۇلى ماقساتتارعا جەتۋگە بولاتىنىن ءاردايىم ايتىپ كەلەمىن. ءبىزدىڭ وتىز جىلداعى تاجىريبەمىز وسىنى ايقىن كورسەتتى. بۇگىندە تاۋەلسىزدىكتىڭ ءتورتىنشى ونجىلدىعىنا قادام باسىپ وتىرمىز. بۇل - جاھاندىق وزگەرىستەر، كۇردەلى ءارى جاۋاپتى شەشىمدەر كەزەڭى. قازاقستان جاڭا ءداۋىردىڭ بارلىق سىناعىنان سۇرىنبەي وتەتىنىنە سەنىمدىمىن. ايقىن ماقساتتار، ساياسي ەرىك-جىگەر، ەڭ باستىسى حالىقتىڭ قولداۋى سونىڭ كەپىلى بولماق، - دەدى نۇرسۇلتان نازاربايەۆ.