ەلباسى «Nur Otan» فراكسياسى دەپۋتاتتارىنىڭ الدىنا ناقتى مىندەتتەر قويدى

نۇر- سۇلتان. قازاقپارات - «Nur Otan» پارتياسىنىڭ ءتوراعاسى نۇرسۇلتان نازاربايەۆ پارلامەنت ماجىلىسىندەگى پارتيا فراكسياسىنىڭ وتىرىسىنا قاتىستى، دەپ حابارلايدى قازاقپارات ەلباسىنىڭ رەسمي سايتىنا سىلتەمە جاساپ.

جيىندى اشقان ەلباسى فراكسيا دەپۋتاتتارىن كەزەكتى پارلامەنت سايلاۋىندا «Nur Otan» پارتياسىنىڭ جەڭىسكە جەتۋىمەن تاعى دا قۇتتىقتادى.

- ءبىز جۇرتشىلىقتىڭ سەنىمىن اقتاۋىمىز كەرەك. بۇل - وتە ماڭىزدى مىندەت ءارى ۇلكەن جاۋاپكەرشىلىك. سوندىقتان ءبىزدىڭ پارتيامىزدىڭ سايلاۋالدى باعدارلاماسىندا ايقىندالعان مىندەتتەرگە قول جەتكىزۋ ءۇشىن فراكتسيا دەپۋتاتتارى بارىن سالۋعا ءتيىس، - دەدى نۇرسۇلتان نازاربايەۆ.

قازاقستاننىڭ تۇڭعىش پرەزيدەنتى ەلىمىزدىڭ ورنىقتى دامۋى مەن حالىقتىڭ ءال- اۋقاتىن ارتتىرۋدى قامتاماسىز ەتۋ بويىنشا پارتيا جۇمىسىنىڭ ناتيجەلەرىنە توقتالدى.

- دامىعان 30 ەلدىڭ قاتارىنا قوسىلۋ ءۇشىن ءبىزدىڭ ناقتى جوسپارىمىز بار، رەسۋرس تا جەتكىلىكتى. وسى جولدا پارلامەنتتەگى ەڭ ۇلكەن فراكتسيا رەتىندە باستى جاۋاپكەرشىلىك سىزدەرگە جۇكتەلەتىن بولادى. العا قويعان ماقساتتارعا قول جەتكىزۋ ءۇشىن ايانباي ەڭبەك ەتەسىزدەر دەگەن سەنىمدەمىن. بارشاڭىزعا بەلگىلى، دەپۋتاتتار قۇرامى ءبىرشاما وزگەردى. جاڭا ادامدار جاڭا يدەيا اكەلەدى جانە پارلامەنتتىڭ قىزمەتىنە تىڭ سەرپىن بەرەدى دەپ سانايمىن، - دەدى پارتيا ءتوراعاسى.

نۇرسۇلتان نازاربايەۆ ءماجىلىستىڭ جەتىنشى شاقىرىلىمىنىڭ جۇمىسى تاۋەلسىزدىكتىڭ 30 جىلدىعىمەن تۇسپا- تۇس كەلۋىنىڭ سيمۆولدىق ءمانى زور ەكەنىن اتاپ ءوتتى.

- وتكەن سايلاۋدا جۇرتشىلىق ءبىزدىڭ پارتيامىزعا ۇلكەن سەنىم ءبىلدىردى. حالىقارالىق بايقاۋشىلار قازاقستاندىقتاردىڭ جوعارى بەلسەندىلىگى مەن ۇيىمشىلدىعىن اتاپ ءوتتى. سايلاۋ اشىق ءارى دەموكراتيالىق تالاپتارعا ساي ءوتتى. وسى جولى دا «Nur Otan» - نىڭ ناقتى ىستەر پارتياسى ەكەنىن دالەلدەي الاسىزدار دەپ كامىل سەنەمىن، - دەدى ەلباسى.

قازاقستاننىڭ تۇڭعىش پرەزيدەنتى ءماجىلىستىڭ وتكەن شاقىرىلىمىنىڭ جۇمىس ناتيجەلەرىنە توقتالىپ، پارلامەنت دەپۋتاتتارى مەن ۇكىمەت مۇشەلەرى قويان- قولتىق جۇمىس ىستەگەنىن ايتتى.

- فراكسيانىڭ ءتيىمدى جۇمىسىن قامتاماسىز ەتۋ ءۇشىن بىرنەشە مىندەتتى شەشكەن ءجون. بىرىنشىدەن، دەپۋتاتتار ۇكىمەتپەن بىرلەسە وتىرىپ، جۇرتشىلىق تاراپىنان قولداۋ تاپقان پارتيانىڭ سايلاۋالدى باعدارلاماسىنىڭ ناتيجەلى جۇزەگە اسىرىلۋىن قامتاماسىز ەتۋى كەرەك. ەكىنشىدەن، دەپۋتاتتار بيۋدجەت قاراجاتىنىڭ ءتيىمدى جۇمسالۋىنا باقىلاۋدى كۇشەيتۋگە ءتيىس. ۇشىنشىدەن، بارلىق الەۋمەتتىك توپتارمەن كەرى بايلانىستى نىعايتقان ابزال. دەپۋتاتتار تۇراقتى تۇردە تۇرعىندارمەن كەزدەسىپ، ازاماتتاردى قوعامدىق قابىلداۋلاردا قابىلداپ وتىرۋى قاجەت، - دەدى نۇرسۇلتان نازاربايەۆ.

وتىرىس بارىسىندا «Nur Otan» پارتياسىنىڭ ءتوراعاسى جەتىنشى شاقىرىلىمداعى پارلامەنت ماجىلىسىندەگى پارتيا فراكتسياسىنىڭ جەتەكشىسى قىزمەتىنە نۇرلان نىعماتۋليندى ۇسىندى. دەپۋتاتتار ەلباسى ۇسىنىسىن ءبىر اۋىزدان قولدادى. سونداي- اق قازاقستاننىڭ تۇڭعىش پرەزيدەنتى كونستيتۋتسياعا جانە «پارلامەنت جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭعا سايكەس فراكتسيا دەپۋتاتتارى ءماجىلىس ءتوراعاسى، ونىڭ ورىنباسارلارى مەن پارلامەنتتىڭ تومەنگى پالاتاسىنىڭ تۇراقتى كوميتەتتەرىنىڭ ءتوراعالارى لاۋازىمىنا كانديداتتاردى ۇسىنۋ جانە بەكىتۋ پروتسەدۋراسىنا قاتىسۋى كەرەك ەكەنىن اتاپ ءوتتى. وسىعان بايلانىستى نۇرسۇلتان نازاربايەۆ پارلامەنت ءماجىلىسىنىڭ باسشىلىق لاۋازىمدارىنا كانديداتۋرالاردى تالقىلاۋدى ۇسىندى. وتىرىس بارىسىندا ماجىلىستەگى باسشىلىق لاۋازىمدارعا كانديداتتاردى ۇسىنۋ بويىنشا فراكسيانىڭ ورتاق ۇستانىمى ازىرلەندى. وعان سايكەس ءماجىلىس ءتوراعاسى قىزمەتىنە ن. نىعماتۋلين، ءماجىلىس ءتوراعاسىنىڭ ورىنباسارلارى قىزمەتىنە پ. كازانتسيەۆ پەن ب. كەسەبايەۆا، الەۋمەتتىك- مادەني دامۋ كوميتەتىنىڭ ءتوراعاسى قىزمەتىنە ج. نۇرمانبەتوۆا، زاڭناما جانە سوت- قۇقىقتىق رەفورما كوميتەتىنىڭ ءتوراعاسى قىزمەتىنە ق. مۋسين، قارجى جانە بيۋدجەت كوميتەتىنىڭ ءتوراعاسى قىزمەتىنە م. قۇسايىنوۆ، حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى قىزمەتىنە ا. قۇسپان، ەكونوميكالىق رەفورمالار جانە وڭىرلىك دامۋ كوميتەتىنىڭ ءتوراعاسى قىزمەتىنە ا. راۋ ۇسىنىلدى.

سونىمەن قاتار ەلباسى بولاشاق پرەمەر- ءمينيستردىڭ كانديداتۋراسى تۋرالى ايتتى.

- مەنىڭ ويىمشا، ساباقتاستىقتى ساقتاعان ءجون. قيىندىقتارعا قاراماستان، ۇكىمەت ءوز جۇمىسىن جاقسى اتقاردى. وزگە ەلدەرمەن سالىستىرعاندا ءبىز جاقسى ناتيجە كورسەتتىك. ەگەر پرەزيدەنت مامين اسقار ۇزاقباي ۇلىن ۇسىنسا، وندا مەن سىزدەردەن ونىڭ كانديداتۋراسىن قولداۋلارىڭىزدى سۇرايمىن، - دەدى نۇرسۇلتان نازاربايەۆ.

سوڭىندا قازاقستاننىڭ تۇڭعىش پرەزيدەنتى جيىنعا قاتىسۋشىلاردى تاعى دا وتكەن سايلاۋداعى ايقىن جەڭىسپەن قۇتتىقتاپ، فراكسيا دەپۋتاتتارىنا تابىستى جۇمىس تىلەدى.

- «Nur Otan» پارتياسىنىڭ دەپۋتاتتىق فراكسياسى ءاردايىم پارلامەنتتەگى جەتەكشى ساياسي كۇش بولىپ كەلەدى. الداعى ۋاقىتتا دا سولاي بولارىنا سەنىمىم مول،- دەدى نۇرسۇلتان نازاربايەۆ.