قازاق بالاسى NASA- دا تاعىلىمدامادان ءوتتى
نازاربايەۆ زياتكەرلىك مەكتەبىنىڭ ونىنشى سىنىپ وقۋشىسى ەراسىل تاۋەكەل NASA عالىمدارى مەن ينجەنەرلەرىنىڭ جانە زەرتتەۋشىلەرىنىڭ دارىستەرىن تىڭدادى. ەكى اپتالىق تاعلىمدامادا قاتىسۋشىلار شيكىزات الۋ ماقساتىندا استەرويدتەرگە ارنالعان ميسسيانى ازىرلەدى. ەراسىلدىڭ دايىنداعان جوباسى ۇزدىكتەر قاتارىنان تابىلىپ، 3-ورىنعا يە بولدى.
16 جاستاعى قازاق بالاسى NASA- نىڭ ليندون دجونسون اتىنداعى عارىش ورتالىعىندا تاعىلىمدامادان ءوتتى. ونلاين فورماتتا وتكەنىمەن قارشاداي بالا ءۇشىن امەريكالىق عارىشكەرلەرمەن تىلدەسۋ كەرەمەت اسەر قالدىرعان. ەراسىل تاۋەكەل بيلل ماكارتۋر، سۋنيتا ۋيليامس جانە مايكل بەيكەردەن سەكىلدى الىپتاردان ءدارىس العان. ول 2 اپتانىڭ ىشىندە شيكىزات الۋ ماقساتىندا استەرويدتەرگە ارنالعان ميسسيانى ازىرلەپ شىعارعان.
ەراسىل تاۋەكەل، نازاربايەۆ زياتكەرلىك مەكتەبىنىڭ 10-سىنىپ وقۋشىسى:
- مەن NASA ماماندارىمەن ونلاين وتىرىپ، زىمىراننىڭ ۇشىرىلۋىن مونيتورينگ جاسادىم. سوندىقتان مەن سول ۇلكەن تاريحي، قۇندى عارىش ميسسياسىنا سۇبەلى ۇلەس قوستىم. بۇل جوبا قيىن، ءبىراق قىزىقتى بولعاندىقتان 6 اي جاسادىم. ءبىزدىڭ زەرتتەۋىمىز 3-ورىن الىپ، كونتراكت جەڭىپ الدىق.
اۋىلداعى اتا- اجەسىنىڭ ۇيىنە بارعاندا اسپانداعى جۇلدىزداردى كورىپ، تامسانعان. ەراسىل قالاعا ورالعاندا كەرەمەت كورىنىستى كوزبەن قايتا كورۋ مۇمكىن بولمادى دەيدى. وسىدان كەيىن جاس بالانىڭ زىمىران عىلىمىنا قىزىعۋشىلىعى ارتقان. ول العاشىندا مودەلدىك زىمىراندارعا ارنالعان تولىق اۆتوماتتاندىرىلعان ۇشىرۋ قوندىرعىسىن جاساپ شىعاردى. دارىندى بالانىڭ عىلىمدا اۋىز تولتىرىپ ايتارلىقتاي وزگە دە جەتىستىكتەرى بار. ماسەلەن، كورەيا، ا ق ش، ماسكەۋ سىندى ەلدەردى باعىندىرىپ، جۇلدەلى ورىندارعا يەلەنگەن.
ورالبەك بيدايبەكوۆ، اەروكوسموناۆتيكا ۇيىرمەسىنىڭ جەتەكشىسى:
- ول ءبىزدىڭ مەكتەپتىڭ ماقتانىشى. ونى بايقاعان مەن ءوزىڭنىڭ زىمىرانىڭدى ۇشىرساڭ قايتەدى دەگەن تاپسىرما قويدىم. ول ءبىر اپتادا ورىندادى. ناعىز ەڭبەكقورلىعىن كورسەتتى. ماعان سۇراقتارمەن كەلىپ وتىرادى. مەن باعىت بەرىپ وتىرامىن. ايتا كەتەرلىگى، «بايقوڭىر» عارىش ايلاعىنا ساپار كەزىندە ەراسىل ءوز جوباسىن قازاقستاندىق عارىشكەرلەر توقتار اۋباكىروۆ پەن تالعات مۇسابايەۆ جانە ايدىن ايىمبەتوۆكە تانىستىرعان.
جاس عالىم ءاردايىم ىزدەنىس ۇستىندە ءجۇرىپ، مۇمكىندىكتەردى قالت جىبەرمەۋگە تىرىساتىنىن ايتادى. وسىلايشا ۇلكەن جەتىستىكتەرگە جەتەتىنىمە سەنىمدىمىن دەيدى.