استانادا LRT قۇرىلىسى جالعاسادى - التاي كولگىنوۆ
بۇل تۋرالى Baigenews تىكەلەي ەفيرىندە نۇر-سۇلتان قالاسىنىڭ اكىمى التاي كولگىنوۆ ءمالىم ەتتى، دەپ حابارلايدى قازاقپارات ءتىلشىسى.
«ۋربانيستيكا ورتالىعى قوعام مەن ترانسپورت سالاسىنداعى مامانداردان ۇسىنىس جيناعانىن بىلەسىزدەر. وسىنىڭ نەگىزىندە حالىقارالىق ماماندار مەن ەل ازاماتتارىنان 400 دەن استام ۇسىنىس ءتۇستى. قورىتا ايتقاندا، ازاماتتاردىڭ 51 پايىزدان استامى جوبانىڭ جالعاسقانىن قالايدى. 42 پايىزى جوبانىڭ وزگە التەرناتيۆادا جاسالعانىن، سالىنعانىن قولدايدى. ال ۇسىنىس بىلدىرگەندەردىڭ 7 پايىزى قۇرىلىستى تولىق ءسۇرىپ تاستاۋ قاجەت ەكەنىن ايتقان. ءبىز بىرنەشە نۇسقانى قاراستىردىق. ونىڭ ىشىندە وسى نىسانداردى بۇزىپ، ورنىن تازارتۋ يدەياسى دا بولدى. ءبىراق قالادا 500 دەن استام باعانا بار. ونى تولىق ءسۇرىپ تاستاۋ ءۇشىن شامامەن 20 ميلليارد تەڭگە قاجەت. سوندىقتان بيۋجەتتەن كوپ قارجى جۇمسالعانىن ەسكەرە كەلە، LRT قۇرىلىسىن تولىق اياقتاۋ ويعا قونىمدى دەپ شەشتىك. دەگەنمەن ۇنەمدەۋگە تۋرا كەلەدى. باستاپقىدا جوباعا 1 ميلليارد دوللاردان استام اقشا قاجەت بولاتىن. ال ءبىز شىعىنداردى قىسقارتۋ ارقىلى قۇرىلىستى اياقتاۋعا 577 ميلليون دوللار قاجەت دەپ وتىرمىز»، - دەدى ەلوردا اكىمى.
التاي كولگىنوۆ باستاپقىدا جوسپارلانعانداي 18 ستانتسيا ەمەس، 8 ستانتسيانى ىسكە قوسىلاتىنىن مالىمدەدى.
ول اۋەجايدان باستاپ قابانباي باتىر داڭعىلىنا دەيىنگى ارالىقتى قامتيدى. اكىمنىڭ سوزىنشە، 5 جىلجىمالى قۇرام جۇمىس ىستەيدى. ءار قۇرامعا جالپى سانى 600 ادام سىياتىن 4 ۆاگون جالعانادى.
«ترانسپورتتىڭ ءجۇرۋ جيىلىگى 15 مينۋت بولادى دەپ جوسپارلانىپ وتىر» دەپ اتاپ ءوتتى التاي كولگىنوۆ.