LRT ءىسى: ەلوردا اكىمىنىڭ بۇرىنعى ورىنباسارىنا ىزدەۋ جاريالاندى
تەرگەۋ ناتيجەسىنە قاراعاندا، نۇر-سۇلتان قالاسى اكىمدىگى مەن استانا LRT- نىڭ لاۋازىمدى تۇلعالارى جانە جەكە كومپانيالاردىڭ ديرەكتورلارى ميللياردتاعان قارجى ۇرلاعانى انىقتالدى.
«قىلمىستىق ءىستى ەلوردا اكىمىنىڭ بۇرىنعى ورىنباسارى قانات سۇلتانبەكوۆ جانە استانا LRT باسشىسى ت. اردان شەتەلدىك جانە قازاقستاندىق كومپانيالاردىڭ كومەگىمەن ۇيىمداستىرعان. وسى لاۋازىمداعى تۇلعالار اكىمدىك باسقارمالارىنىڭ بۇرىنعى باسشىلارى ر. امانجولوۆ، ج. نۇرپەيىسوۆتىڭ قاتىسۋىمەن 24 ميلليارد تەڭگەدەن استام قاراجات جىمقىرىلعان. اكىمىنىڭ بۇرىنعى ورىنباسارى قانات سۇلتانبەكوۆكە ىزدەۋ جاريالاندى»، - دەيدى سەرگەي پەروۆ ەلوردادا وتكەن بريفينگتە.
ونىڭ ايتۋىنشا، بۇل قارجىعا جوبالىق-سمەتالىق قۇجاتتامانى ازىرلەۋ، كەڭەسشىلىك قىزمەتتەردى كورسەتۋ جانە تەحنيكالىق باقىلاۋ شىعىندارى كىرگەن.
«ءوز كەزەگىندە مەردىگەرلىك ۇيىمنىڭ ديرەكتورلارى قوسالقى مەردىگەرلىك كومپانيالارمەن ارتىق باعادا جالعان مامىلەلەر جاساپ، قارجىنى جالعان كاسىپورىندار ارقىلى قولما-قول اقشاعا اينالدىرعان. ناتيجەسىندە مەملەكەتكە 5 ميلليارد تەڭگەدەن ارتىق سومماعا شىعىن كەلدى. ءىس بويىنشا اكىمدىكتىڭ 5 لاۋازىمدى تۇلعاسى (باسشىلىق قۇرامىنان) جانە مەردىگەر ۇيىمداردىڭ 6 باسشىسى جاۋاپقا تارتىلۋدا. ولاردىڭ ىشىندە 5 كۇدىكتى كۇزەتكە ۇستاۋعا الىنعان، 3 ادام قاماۋعا الۋ بۇلتارتپاۋ شاراسىمەن حالىقارالىق ىزدەۋگە بەرىلگەن»، - دەيدى ول.
تەرگەۋ بارىسىندا 3 ادام ءوز كىناسىن مويىنداپ، سايكەسىنشە ولارعا قاتىستى قاماۋعا الۋ قولدانىلماعان. قىلمىستى ءىستى تەرگەۋ وسى ايدىڭ اياسىنا دەيىن اياقتالۋى مۇمكىن.
ەسكە سالساق، پرەزيدەنت LRT قۇرىلىسىن جەدەلدەتۋدى جانە وعان قاتىستى ءىستى تەرگەۋدى تاپسىردى.
بۇعان دەيىن LRT- نىڭ قۇرىلىسى ۋاقىتشا توقتاتىلعانى تۋرالى حابارلاعان بولاتىنبىز.
وعان قاتىستى ۇكىمەت باسشىسى اسقار مامين پىكىر ءبىلدىردى.
سونىمەن قاتار جاقىندا ق ر سىبايلاس جەمقورلىققا قارسى ءىس-قيمىل اگەنتتىگى «استانا LRT» ءىسى بويىنشا ءبىرقاتار جالعان كاسىپورىن تەرگەلىپ جاتقانىن ءمالىم ەتتى.