ساعىنتايەۆ الماتىنىڭ اۋا ساپاسىن كورسەتىپ تۇراتىن LED- ەكرانداردى قوستى

الماتى. قازاقپارات - الماتىدا قالا تۇرعىندارىن مەگاپوليستىڭ ءار اۋماعىنداعى اۋا ساپاسى تۋرالى حاباردار ەتەتىن جوبا ىسكە قوسىلدى.

بۇل تۋرالى اكىم باقىتجان ساعىنتايەۆ Twitter- دەگى پاراقشاسىندا جازدى، دەپ حابارلايدى قازاقپارات.

«اتموسفەرالىق اۋانىڭ ساپاسىن LED- ەكراندا كورسەتەمىز. قالانىڭ ءار بولىگىندە ورنالاسقان داتچيكتەردەگى اقپاراتتى قازگيدرومەت جاڭارتىپ، وڭدەيدى. بۇل جوبا الماتىلىقتاردىڭ قالانىڭ ەكولوگيالىق احۋالىن ءبىلىپ وتىرۋىنا مۇمكىندىك بەرەدى»، - دەپ جازدى ب. ساعىنتايەۆ.

اقپارات 26 داتچيك ارقىلى جاقىن ماڭداعى LED- ەكرانعا تۇسەدى. مۇنداعى مالىمەتتەر ءبىر كۇندە ءۇش رەت جاڭارتىلادى.

قوسىمشا تاعى 10 مونيتورينگىلىك ستانسا قوسىلاتىن بولادى. مالىمەتتەر اۋانىڭ نەگىزگى 6 كورسەتكىشىنەن تۇرادى.

ولار: رم 2,5 ولشەنگەن بولىكتەرى، كۇكىرت ديوكسيدى، ازوت ديوكسيدى، ازوت وكسيدى، كومىرتەگى وكسيدى، فەنول.

بۇل جوبا الماتى اكىمى باقىتجان ساعىنتايەۆتىڭ تاپسىرماسىنا سايكەس جۇزەگە اسىپ وتىر جانە قالانىڭ ەكولوگيالىق احۋالىن جاقسارتۋدىڭ كەشەندى شارالارىنىڭ ءبىرى بولىپ تابىلادى.

ايتا كەتەيىك، ەكولوگيالىق اقپاراتقا قولجەتىمدىلىك قۇقىعى قر ەكولوگيالىق كودەكسىندە ايتىلعان.