ەرجان ماكسيم «Junior Eurovision» بايقاۋىندا ايتاتىن انىنە كليپ ءتۇسىرىپ جاتىر
بۇل تۋرالى قازاقپارات «حابار 24» ارناسىنا سىلتەمە جاساپ حابارلايدى.
بەينەبايان الماتى قالاسىنىڭ كورىكتى جەرلەرى مەن اباي اتىنداعى وپەرا جانە بالەت تەاترىندا تۇسىرىلۋدە.
«Junior Eurovision» بايقاۋىنىڭ شارتى بويىنشا قاتىسۋشىلار ەش جەردە جاريالانباعان 3 مينۋتقا دەيىنگى كومپوزيتسيانى تابيعي داۋىستا ورىنداۋى قاجەت.
«ءانىم وزىمە قاتتى ۇنادى. كورەرمەندەرگە، قازاقستان حالقىنا ۇنايدى دەپ ويلايمىن. جاقىندا تىڭداپ باعاسىن بەرەسىزدەر. تەحنيكالىق جاعىنان قيىندىعى بار. داۋىس كوتەرەتىن جەرلەر دە بار. اۋىر ولەڭ دەپ ايتۋعا دا بولادى. ماعان وزىمە نەگىزى سونداي اندەر ۇنايدى»، - دەيدى ەرجان ماكسيم.
كليپتىڭ اۆتورى - ۋكراينالىق رەجيسسەر الەكساندر فلومبويم. قويۋشى - وپەراتورى كوپتەگەن قازاقستاندىق انشىلەرگە بەينەبايان تۇسىرگەن مامان ستانيسلاۆ يلين. بەينەباياننىڭ مازمۇنى جاقسىلىق، اسقاق ارمانداردىڭ ورىندالۋى جايىندا.
«بۇل - ەرجاننىڭ العاشقى كليپى. ەرجان ءوزىن ءتۇسىرىلىم الاڭىندا ەركىن ۇستايدى. كامەرادان قورىقپايدى. ءاننىڭ مازمۇنىن اشىپ، تىڭدارمانعا جەتكىزۋ ءۇشىن بارىمىزدى سالۋدامىز»، - دەدى قويۋشى-وپەراتور ستانيسلاۆ يلين.
ءتۇسىرىلىم پروتسەسى بارىسىندا ءانشىنىڭ اناسى گۇلميرا الىبەك - ۇنەمى جانىندا. «كەشە سيەمكامىز ساعات 5-6-دا باستالعان بولاتىن. بۇگىن تاڭعى 6-7 گە دەيىن تۇسىرىلىمدە بولدى. ەرجان ەندى كىشكەنتاي بالا. قاتتى شارشايدى. كۇتىمى كەرەك اراسىندا. وتە ۇلكەن جاۋاپكەرشىلىك. ەرجان كىشكەنتاي بولسا دا، ونىڭ ءبارىن ءتۇسىنىپ، ءبىلىپ ءجۇر. قوبالجىپ ءجۇر. بار كۇشىن سالىپ، دايىندالىپ جاتىر»، - دەدى ول.
«Junior Eurovision» حالىقارالىق بالالار ءان بايقاۋى 24 -قاراشا كۇنى پولشانىڭ گليۆيتسە قالاسىندا باستالادى. جەرلەسىمىز ەرجان ماكسيم قاتىساتىن جاس انشىلەر جارىسىن «حابار» تەلەارناسى كورسەتەدى.