Junior Eurovision 2020 بايقاۋىندا قاراقات باشانوۆا ەكىنشى ورىن الدى
ول وسى بايقاۋدا «Forever» ءانىن شىرقاعان ەدى، دەپ حابارلايدى قازاقپارات ءتىلشىسى.
فرانتسيانىڭ اتىنان قاتىسقان ۆالەنتيناعا ءبىرىنشى ورىن بۇيىرسا، ءۇشىنشى ورىندى يسپانيالىق سولەا يەلەندى.
2020-جىلعى Junior Eurovision بايقاۋىنا بەلارۋس، فرانسيا، گرۋزيا، قازاقستان، مالتا، نيدەرلاندى، رەسەي، سەربيا، يسپانيا، ۋكراينا، پولشا جانە گەرمانيا ەلدەرىنىڭ وكىلدەرى قاتىستى.
پاندەمياعا بايلانىستى تىكەلەي ەفير كەزىندە شوۋ جۇرگىزۋشىلەرى پولشادا بولدى. ەۋروپالىق حابار تاراتۋ وداعى (ە ۆ س) بيىل جىل سايىنعى «Junior Eurovision 2020» حالىقارالىق ءان بايقاۋىنىڭ فينالى جاڭا فورماتتا ۇسىنىلاتىنىن جاريالادى. بۇل شەشىمنىڭ باستى سەبەبى - COVID-19 پاندەمياسى.
بارلىق فيناليستەردىڭ دەنساۋلىعىن ساقتاۋ ماقساتىندا بايقاۋدا ورىندالۋعا ءتيىستى اندەر سايىسقا قاتىسۋشى ەلدىڭ جەرگىلىكتى ستۋدياسىندا ورىندالدى. ايتا كەتەيىك، ەرەسەكتەر اراسىندا وتەتىن «ەۆروۆيدەنيەنىڭ» تاعى ءبىر ايىرماشىلىعى، Junior Eurovision ءان بايقاۋىنا قاتىسۋشى ەلدەرگە ءوز وكىلدەرىن قولداۋعا رۇقسات ەتىلەدى.
18- Junior Eurovision ءان بايقاۋىنىڭ جەڭىمپازى قازىلار القاسىنىڭ داۋىس بەرۋى جانە ونلاين- داۋىس بەرۋ ارقىلى انىقتالدى. داۋىس بەرۋ جۇيەسى ءداستۇرلى نەگىزدە: %50 قازىلار القاسىنىڭ شەشىمى جانە %50 ونلاين داۋىس بەرۋ ناتيجەسىنە بايلانىستى.
ونلاين داۋىس بەرۋ junioreurovision.tv سايتىندا 2 كەزەڭدە وتەدى. داۋىس بەرۋدىڭ ءبىرىنشى كەزەڭى 28- قاراشا كۇنى ساعات 01:00 دە اشىلدى جانە 29- قاراشا كۇنى كونكۋرس فينالىنىڭ تىكەلەي كورسەتىلىمى باستالعانعا دەيىن جالعاستى. داۋىس بەرۋدىڭ ەكىنشى كەزەڭى بارلىق قاتىسۋشىلاردىڭ مۋزىكالىق قويىلىمىنان كەيىن باستالىپ، 15 مينۋتقا سوزىلدى.
قازاقستان Junior Eurovision ءان بايقاۋىنا العاش رەت 2018-جىلى قاتىستى. وندا دانەليا تولەشوۆا «وزىڭە سەن» انىمەن التىنشى ورىنعا يە بولدى. 2019-جىلى ەرجان ماكسيم «ارمانىڭنان قالما» انىمەن ەكىنشى ورىندى (قازىلار القاسىنىڭ شەشىمى بويىنشا ءبىرىنشى) يەلەندى.
قازاقستاننىڭ بۇل حالىقارالىق بايقاۋعا ءۇشىنشى رەت قاتىسۋى «حابار» اگەنتتىگىنىڭ ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولۋىنىڭ ارقاسىندا مۇمكىن بولدى.
ەسكە سالا كەتەيىك، 26- قىركۇيەكتە وتكەن ۇلتتىق ىرىكتەۋ فينالىنا ەلىمىزدىڭ تۇكپىر- تۇكپىرىنەن كەلگەن ون ەكى بالا قاتىسقان ەدى. ولاردىڭ اراسىندا الماتى وبلىسى رىسقۇلوۆ اۋىلىنان كەلگەن قاراقات باشانوۆا جەڭىسكە جەتتى.