Junior Eurovision بايقاۋىنا قاتىساتىن 12 جاسار قاراقات باشانوۆانىڭ بەينەكليپى جاريالاندى
ەسكە سالا كەتەيىك، 26-قىركۇيەكتە وتكەن ۇلتتىق ىرىكتەۋ فينالىنا ەلىمىزدىڭ تۇكپىر- تۇكپىرىنەن كەلگەن ون ەكى بالا قاتىسقان ەدى. ولاردىڭ اراسىندا الماتى وبلىسى رىسقۇلوۆ اۋىلىنان كەلگەن قاراقات باشانوۆا جەڭىسكە جەتتى. جاس ءانشى فينالدا اكەسىنە ارنالعان «Forever» ءانىن ورىندادى. كومپوزيتسيانى وتكەن جىلى Junior Eurovision-دە ونەر كورسەتكەن ەرجان ماكسيمنىڭ «ارمانىڭنان قالما» ءانىنىڭ اۆتورى حاميت شانعاليەۆ شىعاردى.
قاراقات كورەرمەندەردىڭ جانە قازىلار القاسىنىڭ داۋىس بەرۋ ناتيجەسى بويىنشا جەڭىمپاز دەپ تانىلدى. ەندى قاراقات قازاقستاننىڭ اتىنان پولشادا وتەتىن حالىقارالىق گراند- فينالدا ونەر كورسەتەدى. ونىڭ جاڭا كليپىنە فينالدا ورىنداعان «Forever» ءانى ارقاۋ بولعان. «Junior Eurovision» بايقاۋىنىڭ فينالى 29 -قاراشادا ونلاين وتەدى. وندا الەمنىڭ 13 ەلىنەن 9-14 جاس ارالىعىنداعى جاس ۆوكاليستەر باق سىنايدى. قازاقستان سايىسقا ءۇشىنشى رەت قاتىسادى.