قاسىم-جومارت توقايەۆ ورتالىق ازيا ءۇشىن ۇندىستانمەن بىرلەسە IT- مەكتەپ اشۋدى ۇسىندى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ سيفرلاندىرۋ سالاسىنداعى ىنتىماقتاستىق بويىنشا قازاقستانعا ءۇندىستاننىڭ كومپانيالارىن شاقىردى، دەپ حابارلايدى قازاقپارات ءتىلشىسى.

«جالپى الەمدىك باستى ترەند رەتىندە ەكونوميكانى سيفرلاندىرۋ قالىپ وتىر. قازاقستاندا ەلەكتروندى ۇكىمەت ءتيىمدى جۇمىس ىستەپ تۇر. ەكونوميكانىڭ بارشا جۇيە قۇراۋشى سەكتورلارىن سيفرلاندىرۋ، سونداي-اق Smart قالالاردى، مەديتسينا مەن ءبىلىم بەرۋ سالالارىن دامىتۋ بويىنشا جوبالار جۇزەگە اسىرىلىپ جاتىر. سيفرلىق شەشىمدەر بانكتىك-قارجىلىق جۇيەدە تابىستى قولدانىلىپ كەلەدى»، - دەدى مەملەكەت باسشىسى «ورتالىق ازيا - ءۇندىستان» سامميتىندە.

سونىمەن قاتار پرەزيدەنت قازىرگى كەزدە جاساندى ينتەللەكت ەنگىزۋى، Big data، ونلاين كوممەرتسيا مەن كيبەرقاۋىپسىزدىك سەكىلدى سالالاردى دامىتۋ سۇرانىسقا يە ەكەنىن اتاپ ءوتتى.

مۇنىمەن قوسا، قازاقستاندا تەلەكوممۋنيكاتسيا، ەلەكتروندى ونەركاسىپ سالاسىندا زەرتحانالاردى، سونداي-اق ەلەكتروندى تەحنيكانىنىڭ جيناقتاۋ وندىرىستەرىن قۇرۋ جوبالارى قىزىعۋشىلىق تۋدىرادى.

«ءبىز وسى باعىتتار بويىنشا ءوزارا ءتيىمدى ىنتىماقتاستىققا دايىنبىز. ءۇندىستان كومپانيالارىن قازاقستاندىق نارىققا شاقىرامىز. قازاقستان حالقىنا جولداۋىمدا 2025-جىلعا قاراي 100 مىڭنان كەم ەمەس جوعارى بىلىكتى IT - ماماندى دايارلاۋ مىندەتىن قويدىم. وسىعان بايلانىستى IT جانە ينجەنەر كادرلاردى وقىتۋدا ءۇندىستاننىڭ مول تاجىريبەسى ءبىز ءۇشىن قىزىقتى بولىپ تۇر»، - دەدى قاسىم-جومارت توقايەۆ.

پرەزيدەنت اتالعان سالاداعى تاجىريبەلىك قادام رەتىندە «Astana Hub» IT- ستارتاپتار حالىقارالىق تەحنوپاركىنىڭ بازاسىندا Bagmane جانە باسقا دا ۇندىلىك IT - الپاۋىتتارمەن بىرلەسە ورتالىق ازيا ءۇشىن ينجەنەرلىك كەڭسە مەن اقپاراتتىق تەحنولوگيا مەكتەبىن اشۋدى ۇسىندى.