ەلوردادا قانداي IT جوبالار جۇزەگە اسىپ جاتىر؟
«وسىدان ءبىر جىل بۇرىن IT كەڭەستىڭ جۇمىسىن باستادىق. ول سيفرلىق تەحنولوگيالاردى ودان ءارى دامىتىپ، ەنگىزۋگە باعىتتالعان. IT كەڭەستەگى ءاربىر كەزدەسۋ جاي عانا كەزدەسۋ ەمەس، بۇل قالا مەن تۇرعىندارعا قاجەت ناقتى جوبالاردى كاسىبي تۇرعىدا تالقىلاپ، ەنگىزۋ»، - دەدى اكىم Instagram-داعى پاراقشاسىندا.
ونىڭ ايتۋىنشا، مەملەكەت باسشىسى «سيفرلاندىرۋ - بارلىق رەفورمالاردىڭ بازالىق ەلەمەنتى» دەپ اتاپ وتكەن.
اكىم مىسال رەتىندە پاندەميا كەزىندە پاتسيەنتتەردى مەديتسينالىق مەكەمەلەرگە بىركەلكى تاراتۋعا مۇمكىندىك بەرەتىن قوسىمشالار جاسالدى، تەلەمەديتسينا ەنگىزىلگەنىن اتادى.
« IT كەڭەستە تانىستىرىلعان ءبىرقاتار جوبا باسقا دا سالالارعا ەنگىزىلدى. مىسالى، 20 دان استام مەكتەپتە حيميا، بيولوگيا، فيزيكا سياقتى پاندەردى كورنەكى تۇردە كورسەتۋگە مۇمكىندىك بەرەتىن Roqed Science باعدارلاماسى ەنگىزىلدى. بۇل وقۋشىلارعا ماتەريالداردى تۇسىندىرۋگە مۇمكىندىك بەرەدى. سونىمەن قاتار ءبىرقاتار مەكتەپتە Smart Recirculation Control جوباسى ىسكە قوسىلدى. يننوۆاتسيالىق تەحنولوگيا اۋانى تازارتۋعا جانە زارارسىزداندىرۋعا، سول ارقىلى ءۇي-جايدى يونيزاتسيالاۋعا، اۋانىڭ تۇتىندەنۋىنە مونيتورينگ جۇرگىزۋگە، تاۋلىك بويى بەينەباقىلاۋ مەن ۆيزۋالدى باقىلاۋ جۇرگىزۋگە مۇمكىندىك بەرەدى. سونداي-اق، دەنە تەمپەراتۋراسىن ولشەيتىن، ماسكانىڭ بار-جوعىن بىردەن بىلەتىن جۇيە ىسكە قوسىلدى»، - دەدى التاي كولگىنوۆ.
اكىم قالانى اۋقىمدى سيفرلاندىرۋدى جۇرگىزەتىنىمىز تۋرالى ايتقانىن ەسكە سالدى.
«مىسالى، ينجەنەرلىك جەلىلەردى سيفرلاندىرۋ ولاردىڭ ناقتى جاعدايىن كورۋگە، جوندەۋ جۇمىستارىن ۋاقتىلى جۇرگىزۋگە، قاجەت بولعان جاعدايدا قۋاتتى ارتتىرۋعا، تاۋەكەلدەردى ازايتۋعا جانە ت. ب. مۇمكىندىك بەرەدى.
قالانى سيفرلاندىرۋ جۇمىسى قازىر اياقتالۋعا جاقىن. سونىمەن قاتار، ۇسىنىلعان جوبالاردىڭ اراسىندا ەكولوگيا، قاۋىپسىزدىك، الەۋمەتتىك سالالارداعى جوبالار دا بار. مىسالى، جاسىل جەلەكتەردى تۇگەندەۋ، ليۋكتەردىڭ مونيتورينگى، زاڭسىز قوقىستاردىڭ الدىن الۋ جانە انىقتاۋدى باقىلاۋ جانە ت. ب. ءۇشىن جۇيەلەر ازىرلەندى. ىرىكتەلگەن جوبالار تولىقتاي ىسكە اسىرىلادى»، - دەدى ەلوردا اكىمى.