Imanbek ا ق ش- تا تاعى ءبىر مۋزىكالىق سىيلىقتىڭ جەڭىمپازى اتاندى

نۇر- سۇلتان. قازاقپارات- وتانداسىمىز ديدجەي يمانبەك زەيكەنوۆ الەمدىك دەڭگەيدەگى مۋزىكالىق سىيلىققا يە بولدى، دەپ حابارلايدى قازاقپارات ءتىلشىسى.

بۇگىن تاڭەرتەڭ ا ق ش- تا الەمدىك دارەجەدەگى Billboard Music Awards سىيلىعىنىڭ تابىس ەتۋ ءراسىمى ءوتتى. اتالعان مۋزىكالىق باسەكەدە جەرلەسىمىز يمانبەك زەيكەنوۆتىڭ Imanbek «Roses» كومپوزيتسياسىنا جازعان رەميكس نۇسقاسى Top Dance/Electronic Song نوميناتسياسى بويىنشا جەڭىمپاز اتاندى.

ول تۋرالى Billboard Music Awards سىيلىعىنىڭ رەسمي سايتىندا جازىلعان. ودان بولەك، قۋانىشتى حابارمەن ديدجەي ءوزىنىڭ Instagram پاراقشاسىندا ءبولىستى.

«Billboard Music سىيلىعىن الدىم، بۇل ءدال گرەممي سىيلىعى سەكىلدى»، - دەپ جازدى ول. ەسكە سالا كەتەيىك، بيىل ناۋرىز ايىندا يمانبەك زەيكەنوۆ جوعارىدا اتالعان مۋزىكالىق تۋىندىسى ءۇشىن ايگىلى «گرەممي» ۇتىپ العان بولاتىن.