تاعى ءبىر قازاقستاندىق Google كومپانياسىنا جۇمىسقا تۇردى

نۇر- سۇلتان. قازاقپارات - الەمگە ايگىلى Google كومپانياسىندا قىزمەت ىستەۋ تاعى ءبىر وتانداسىمىزعا بۇيىردى. بۇل جولى شىعىس قازاقستان وبلىسىنىڭ تۋماسى جاسان بايپاقبايەۆ اتالعان كومپانياعا ينجەنەر مامانى بولىپ تۇردى.

وسى تۇرعىدا قازاقپارات ءتىلشىسى قىزمەتىنە ەندى كىرىسكەن جەرلەسىمىزبەن تىلدەسكەن بولاتىن.

«مەن ءوزىم شىعىس قازاقستان وبلىسىنىڭ كۇرشىم اۋدانى، قاراتوعاي اۋىلىندا تۋىپ وسكەم. مەكتەپ بىتىرگەن سوڭ الماتىداعى س. دەميرەل اتىنداعى ۋنيۆەرسيتەتتىڭ «اقپاراتتىق جۇيەلەر» ماماندىعىندا ءتۇستىم. ول جەردەن باكالاۆر دارەجەسىن الىپ شىعىپ، قازاق- بريتان تەحنيكالىق ۋنيۆەرسيتەتىنە ءدال سول ماماندىق بويىنشا ماگيستراتۋرادا ءبىلىمىمدى جالعاستىردىم.

ءيا، Google سەكىلدى ايگىلى كومپانياعا جۇمىسقا تۇرۋ مەنىڭ ماماندىعىم بويىنشا وقىعان ءاربىر ستۋدەنتتىڭ ارمانى دەۋگە بولادى. جانە وندا جۇمىسقا ورنالاسۋ پروتسەسى كوپكە ءمالىم. ياعني اقپاراتتىق تەحنولوگيالار سالاسىنىڭ ماماندارىنا ول ەرەجەمەن ەتەنە تانىس. جالپى بۇعان دەيىن ا ق ش- تا ستارتاپ سالاسىندا ازداپ ەڭبەك ەتكەم، سوندىقتان دا اقپاراتتىق تەحنولوگيا بويىنشا تاجىريبەم بار دەپ ايتۋعا بولادى. Google كومپانياسىنا ينجەنەر مامانى بولىپ جۇمىسقا تۇردىم»، - دەدى جاسان بايپاقبايەۆ.

ونىڭ ايتۋىنشا، اتالعان كومپانياعا جۇمىسقا تۇرعان سوڭ قىزمەتكەردىڭ سول ورتاعا تەز بەيىمدەلۋى ءۇشىن ارنايى دارىستەر ۇيىمداستىرىلادى.

«دارىستە كومپانيانىڭ قۇرىلۋ تاريحىنان باستاپ، وندا جۇمىس ىستەۋ، قىزمەتكەردىڭ ماقساتى پەن مىندەتى تۋرالى، سول سياقتى ورتاعا تەز ءسىڭىپ كەتۋ جولىنداعى پايدالى اقپاراتتار بەرىلەدى. مەن ءۇشىن ول ءدارىستىڭ پايداسى كوپ بولدى»، - دەدى ول.

سونداي- اق، وتانداسىمىز Google كومپانياسىندا جۇمىس ىستەۋدى ارماندايتىن جاس وركەنگە ءوز كەڭەسىن ايتتى.

«كوبىنەسە اكادەميالىق بىلىمگە نازار اۋدارعان ءجون. عىلىمعا جاقىن بولۋ كەرەك. سول سياقتى ەسەپ شىعارۋ قابىلەتى ارتىق ەتپەيدى. ياعني الگوريتم ەرەجەلەرىن تەرەڭ بىلگەن دۇرىس. ودان بولەك، ارينە پراكتيكادان ءوتۋ قاجەت، ونسىز بولمايدى. ءىرى كومپانيادا جۇمىس ىستەۋدىڭ تاعى ءبىر ارتىقشىلىعى قىزمەتكەرگە جاعدايدىڭ جاسالۋى. سوندىقتاندا كوپ جاستار ءىرى كومپانيا، حولدينگتەردە جۇمىس ىستەۋگە ۇمتىلادى. جانە بۇل دۇرىس ءۇردىس. Google-دە باسقاسىن ايتپاعاننىڭ وزىندە بارلىق قىزمەتكەرلەر ءۇش مەزگىل اسپەن جانە قىزمەتتىك كولىكپەن قامتاماسىز ەتىلەدى»، - دەيدى ول.

ودان بولەك، جەرلەسىمىز بوس ۋاقىتىندا ەل- جەر ارالاپ كورگەندى، ال سپورتتان ۆولەيبول جانە تەننيسپەن اۋەستەنەتىنىن ايتىپ ءوتتى.

اۆتور: ءالي يبرايەۆ