COVID-19: كيم نەگە كىجىنىپ ءجۇر - سولتۇستىك كورەيا
16 مامىر 22:34

COVID-19: كيم نەگە كىجىنىپ ءجۇر - سولتۇستىك كورەيا

نۇر-سۇلتان.قازاقپارات - الەم كوروناۆيرۋس زاردابىن ۇمىتا باستاعان ەدى. سويتسەك ىندەت كەتپەگەن ەكەن.

ەكى جىل بويىنا شەكارادان ۇشقان قۇس تۇگىلى ۆيرۋس وتكىزبەدىك دەگەن سولتۇستىك كورەيانى تىعىرىققا تىرەدى، دەپ حابارلايدى «حابار 24».

الپاۋىت ەلدەرگە دوق كورسەتىپ، ماڭعازدانىپ جۇرەتىن كيم چەن ىنننان مازا كەتتى. ال انشەيىندە سولتۇستىكتەگى كورشىسىنەن سەكەم الىپ وتىراتىن وڭتۇستىك كورەيانىڭ باۋىرلاس ەلگە بۇيرەگى بۇرىپ تۇر. سولتۇستىك كورەيادان بولەك قازىر قىتاي دا كوۆيدكە قارسى كۇرەستى كۇشەيتكەن. كوروناۆيرۋس كيم چەن ىندى اياعىنان تىك تۇرعىزدى. كوسەم تۇندەلەتىپ تابانىنان تاۋسىلىپ، ءدارىحانالاردى ءوزى ارالاپ ءجۇر. ءدال وسى كۇنى كوممۋنيستىك پارتيانىڭ شۇعىل ساياسي بيۋروسىن دا وتكىزدى. توتەنشە جيىندا اسكەريلەرگە ەل استاناسىنداعى ءدارىحانالارعا كوروناۆيرۋستى ەمدەۋگە ارنالعان ءدارى- دارمەكتى تەز ارادا جەتكىزۋدى بۇيىردى.

كيم «ۇكىمەت پەن مەديتسينا سالاسى قىزمەتكەرلەرىنىڭ جۇمىسى سىن كوتەرمەيدى»، - دەپ كىجىندى. سوڭعى رەسمي دەرەك بويىنشا ەلدە تاعى 8 ادام ىندەتتەن كوز جۇمىپ، قۇربانداردىڭ جالپى سانى 50 گە جەتتى. سونداي- اق 400 مىڭعا جۋىق تۇرعىن اۋرۋعا شالدىعىپ، ناۋقاستار قاتارى 1 ميلليون 200 مىڭنان استى. سولتۇستىك كورەيادا كوۆيدكە قارسى ۆاكسينا مۇلدە سالىنباعان. حالىق ەمدىك ءشوپ قايناتىپ ءىشىپ، اۋزىن تۇزدى سۋمەن شايىپ الەك. جەرگىلىكتى بيلىك كوروناۆيرۋس بەلگىلەرىن ازىرگە بەزگەك دەپ حابارلاپ جاتىر.

كيم حيوڭ حان، ك ح د ر دەنساۋلىق ساقتاۋ ۆيتسە- ءمينيسترى:

- ءبىز كارانتيننەن ەمدەۋ جۇيەسىنە وتتىك. بىزگە قازىر جۇكتەلىپ وتىرعان باستى مىندەت - ەپيدەميولوگيالىق جاعدايدى رەتتەۋ. بەزگەگى بار ادامداردى انىقتاپ، ولاردى وقشاۋلاپ، ەمگە جاتقىزۋ جۇمىسى قارقىندى ءجۇرىپ جاتىر.

جاڭالىقتار