COVID-19: اقتوبەدە تىركەلگەن العاشقى جاعداي، شەكتەۋلەر مەن شۇعىل شەشىمدەر
سودان بەرى 4 مىڭنان استام ادامنان ۆيرۋس انىقتالىپ، ونىڭ 95 پايىزدان استامى جازىلدى.
COVID-19 دەرتى اقتوبە مەديتسيناسىن قالاي وزگەرتتى؟قازاقپارات ءتىلشىسى اقتوبە وڭىرىندەگى جۇمىستى قورىتىندىلادى.
مەديتسينا سالاسىنا 5 ميلليارد تەڭگە جۇمسالدى
اقتوبە وبلىسى پاندەميا كەزىندە كۇرەس جۇمىستارىن كۇشەيتىپ، 5 ميلليارد تەڭگە جۇمسادى. بۇل قارجى تەحنيكانى جاڭارتۋعا، اۋرۋحانانى جوندەۋگە جانە دارىگەرلەرگە جۇمسالدى. «قازىرگى كەزدە 445 كەرەۋەت جۇمىس دايىن تۇر. قاجەت بولعان جاعدايدا 3603 كەرەۋەتكە دەيىن كوبەيتە الامىز. ونىڭ ىشىندە 401 ءى جاقساقتاۋ بولىمىندە. پاندەميا كەزىندە كوپ اپپارات ساتىپ الىندى. زاماناۋي كومپيۋتەرلىك توموگرافيادان وزگە، ستاتسيونارلىق رەنتگەن اپپاراتتارى، وكپەنى جاساندى جەلدەتەتىن اپپاراتتارى، وتتەگى كونتسەنتراتى، 41 بىرلىك سانيتارلىق كولىك، 6 ءموبيلدى مەديتسينالىق اۆتوبۋس پەن كاماز جانىنداعى 2 جىلجىمالى مەديتسينالىق كەشەن ساتىپ الىندى. 100 دەن استام ارنايى كەرەۋەت پەن 50 دەن استام مونيتور جەتكىزىلدى»، - دەدى اقتوبە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.
سونىمەن بىرگە اۋرۋحانالاردى جوندەۋ جۇرگىزىلدى.
«بارلىعى 25 مەديتسينالىق ۇيىمدا كۇردەلى جوندەۋ جۇمىسى جۇرگىزىلدى. تورتەۋىنە ورتالىقتاندىرىلعان وتتەگى جۇيەسى ورناتىلدى. سونىمەن بىرگە بىرەۋىندە اۆتونومدى وتتەگى ستانتسياسى بار»، - دەدى بەكبولات ءىزباساروۆ.
العاشقى جاعداي 22 ناۋرىز كۇنى تىركەلدى
ەل ىشىندە كارانتين جاريالانعان تۇستا شەتەلدەن كەلگەن ءار ادام باقىلاۋدا بولدى. اقتوبە وبلىسى بويىنشا الدىمەن قىتايدان ءتورت، يتاليادان كەلگەن ەكى ادام كارانتينگە جاتقىزىلدى. سول كەزدە ينفەكتسيالىق اۋرۋحانادا ارنايى 25 كەرەۋەتتىك يزولياتور جانە جۇيكە اۋرۋىنا شالدىققان ازاماتتاردى ەمدەۋ ورنىندا قوسىمشا 105 كەرەۋەت دايىن تۇردى. وعان مەديتسينالىق كوللەدجدىڭ جاتاقحاناسى مەن «مۇنايشى» لاگەرى قوسىلدى. العاشىندا جەدەل جاردەمنىڭ ەكى بريگاداسى دايىندالدى.
ماسكەۋ ارقىلى يسپانيادان كەلگەن اقتوبەلىكتەن ۆيرۋس انىقتالىپ، ارادا ەكى اپتا وتكەندە ول ەمدەلىپ شىقتى.
تەگىن بەتپەردە، Call ورتالىق پەن العاشقى شەكتەۋ شارالارى
العاش كەزدە اقتوبەدە بەتپەردە تاپشىلىعى انىق سەزىلدى. كەيىن شاعىن جانە ورتا بيزنەس يەلەرى، تىگىن سەحتارى ماقتا ماتادان كوپ رەتتىك ماسكا تىكتى. سونىمەن قاتار 1406 ءنومىرى تاۋلىك بويى جۇمىس ىستەدى.
كوروناۆيرۋس ينفەكتسياسىنا قاتىستى سۇراقتار بويىنشا سول كەزدەگى اقتوبە وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ 8/7132/ 55-77-37 بايلانىس نومەرىنە، دارىلەر جانە ماسكالار بويىنشا - 8/7132/ 55-75-18 بايلانىس نومەرىنە حابارلاسۋعا مۇمكىندىك بەرىلدى. تەمىرجولدا ترانزيتتىك باعىتتار توقتادى.
رەسەيدىڭ ورىنبور، ورسك، قازان قالالارىنا اۆتوبۋس جۇرمەدى.
كارانتين ەرەجەسىن بۇزعان ادامدار مەن كاسىپكەرلەر جازالاندى
بەتپەردەگى ساتىپ الىپ، باعاسىن كوتەرىپ ساتقان ادامدار ۇستالدى. بىردەن قىلمىستىق كودەكستىڭ «زاڭسىز كاسىپكەرلىك» بابىمەن ءىس قوزعالىپ، تەرگەۋ ءجۇردى.
سونىمەن بىرگە جالعان اقپارات تاراتىپ، ەلدى ۇرەيدە ۇستاعاندار جازالاندى. ماسەلەن، ەر ادام ءوز ءۇيىنىڭ اۋلاسىندا قورعانىش كيىمدەرى مەن بەتپەردە كيگەن ادامدار بالالار الاڭىندا دەزينفەكتسيا جۇمىستارىن جۇرگىزىپ جاتقانىن كورگەن. ونى ۆيدەوعا ءتۇسىرىپ، ونى «بادامشا اۋىلىندا كوروناۆيرۋس ينفەكتسياسىن جۇقتىرعان ادام انىقتالدى» دەگەن كوممەنتاريمەن تۋىستارىنا تاراتقان.
34 جاستاعى ەر ازامات ۇستالىپ، ءوز كىناسىن تولىعىمەن مويىندادى.
«موبيلدى توپ بيىل دا جۇمىسىن جالعاستىردى. بارلىعى 100-دەن استام زاڭبۇزۋشىلىقتى انىقتاپ، ولارعا 19 ميلليون تەڭگە ايىپپۇل سالىندى. بۇگىنگى كۇنگە دەيىن 4 مىڭنان استام ادامنان كوروناۆيرۋس ينفەكتسياسى انىقتالسا، ونىڭ تەڭ جارتىسىنان استامى سيمپتومدى. تىركەلگەن جاعدايدىڭ 80 پايىزدان استامى جەرگىلىكتى. سىرتتان تاسىمالدانعانى تەك 3,3 پايىزى عانا.
ال 2021 -جىلدىڭ باسىنان بەرى كوروناۆيرۋس ينفەكتسياسى كوبىنە 30-39 جاس ارالىعىنداعى جاستاردان انىقتالىپ جاتىر. بارلىعى 145 جاعداي تىركەلدى. ال پنيەۆمونياعا كەلەر بولساق، بيىل 66 جاستان اسقان ادامدار انىقتالىپ جاتىر»، - دەدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحتار سەربايەۆ.