COVID-19 ۆيرۋسىنان ەكى ميلليون ادام قايتىس بولدى: ب ۇ ۇ باسشىسى مالىمدەمە جاسادى
وسىعان بايلانىستى ب ۇ ۇ باس حاتشىسى مالىمدەمە جاساپ، ۆيرۋسپەن كۇرەستە، اسىرەسە ۆاكتسينالاردى تاراتۋ ماسەلەسىندە ىنتىماقتاسۋعا شاقىردى.
بۇل تۋرالى قازاقپارات ب ۇ ۇ جاڭالىقتار ورتالىعىنا سىلتەمە جاساپ حابارلايدى.
«وسى ەكى ميلليون ادامنىڭ ءومىرىن ەسكە الا وتىرىپ، الەم كۇش جۇمىلدىرۋى كەرەك»، - دەدى ب ۇ ۇ باسشىسى.
ونى ۆاكتسينالاردىڭ اينالاسىندا پايدا بولعان «ۆاكۋۋم» مازالايدى. گۋتەرريشتىڭ ايتۋىنشا، تابىسى جوعارى مەملەكەتتەر ۆاكتسينالارعا تەز قول جەتكىزسە، الەمدەگى ەڭ كەدەي ەلدەردە كەرىسىنشە ورىن الىپ وتىر. كەيبىر مەملەكەتتەر استىرتىن كەلىسىم جاساپ، ۆاكتسينالاردى ارتىعىمەن ساتىپ الۋدا.
«ۆاكتسينا وندىرۋشىلەر جاۋاپكەرشىلىكتى سەزىنىپ، COVAX مەحانيزمىمەن جانە بۇكىل الەمدەگى ەلدەرمەن بىرلەسىپ، ۆاكتسينالاردى قاجەتتى مولشەردە جەتكىزىپ، دۇرىس تاراتۋ ءۇشىن جۇمىس ىستەۋى كەرەك»، - دەدى باس حاتشى.
«ەلدەر ۆاكتسينالاردىڭ ارتىق مولشەرىن بولىسۋگە مىندەتتەمە الۋى ءتيىس». وسىلار ورىندالعاننان كەيىن عانا الەمدەگى مەديتسينا قىزمەتكەرلەرىن تەز ارادا ۆاكتسيناتسيالاۋعا جانە دەنساۋلىق ساقتاۋ جۇيەلەرىن ساقتاپ قالۋعا بولاتىندىعىن ايتتى ول.
سودان كەيىن بارىپ باسقا دا قاتەر توبىنداعىلاردى ۆاكتسيناتسيالاۋدى جالعاستىرۋعا بولادى. انتونيۋ گۋتەرريش حالىقتى ۆاكتسينالار تۋرالى حاباردار ەتۋدىڭ جانە ادامداردا پايدا بولعان سەنىمسىزدىكتى جويۋ قاجەتتىلىگىن اتاپ ءوتتى. بۇۇ باسشىسى عالىمدار مەن دارىگەرلەر ءوز جۇمىستارىن جۇرگىزىپ جاتقاندا، ءبارىمىز دە ۇلەس قوسۋىمىز كەرەك ەكەنىن ەسكە سالدى: «ءبىر-ءبىرىمىزدى قورعاۋ ءۇشىن قاراپايىم جانە دالەلدەنگەن نارسەلەردى ەستە ساقتايىق: ماسكا تاعۋ، فيزيكالىق قاشىقتىقتى ساقتاۋ جانە كوپشىلىكتەن اۋلاق بولۋ. ءبىزدىڭ الەم بۇل ۆيرۋستى بىرلەسىپ ارەكەت ەتكەندە عانا جەڭە الادى»، - دەپ قورىتىندىلادى باس حاتشى.