COVID-19-عا قارسى ۆاكتسينانى وزدەرىنە سىناعان قازاقستاندىق عالىمداردىڭ جاعدايى جاقسى – ينستيتۋت

نۇر- سۇلتان. قازاقپارات - COVID-19-عا قارسى جاساعان ۆاكتسينانى وزدەرىنە سىناپ كورگەن قازاقستاندىق بەس عالىمنىڭ جاعدايى جاقسى.

COVID-19 اۋرۋىنا قارسى QazCovid-in ۆاكتسيناسىنىڭ ازىرلەنۋىنە قاتىستى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى وسىنداي حابارلاما تاراتتى، دەپ حابارلايدى قازاقپارات ءتىلشىسى.

«ۆاكتسينا COVID-19-عا قارسى ءبىرىنشى وتاندىق ۆاكتسينانى دايىنداۋ جانە ساقتاۋ تەحنولوگياسىن ازىرلەۋ بويىنشا عىلىمي- زەرتتەۋ جۇمىستارىن تىكەلەي ورىندايتىن ينستيتۋتتىڭ عىلىمي قىزمەتكەرلەرىن تولىقتاي ەپيدەمولوگيالىق قورعاۋ ءۇشىن قاجەت بولدى. اتالعان عىلىمي قىزمەتكەرلەر COVID-19-عا شالدىعىپ قالعان جاعدايدا ينستيتۋت وتاندىق ۆاكتسينا ازىرلەۋگە باعىتتالعان ماڭىزدى مەملەكەتتىك مىندەتتى ورىندايتىن ەڭ قۇندى ماماندارىنان ۇزاق ۋاقىتقا ايىرىلىپ قالار ەدى. ءوزى دايىنداعان ۆاكتسينانى ۆاكتسيناتسيالاۋ مەديتسينالىق جانە يممۋنوبيولوگيالىق پرەپاراتتاردى ازىرلەۋشىلەردىڭ جاريا ەمەس عىلىمي ستاندارتى سانالادى. ازىرلەۋشى ەڭ الدىمەن ءوزىنىڭ ازىرلەمەسىنىڭ قاۋىپسىزدىگى مەن يممۋنوگەندىگىن وزىنە سىناۋى ءتيىس. ەكىنشىدەن، ءوزىنىڭ زەرتتەۋىنىڭ ناتيجەسى مەن ساپاسى ءۇشىن تولىقتاي جاۋاپكەرشىلىك الادى. وسىلايشا، كلينيكالىق سىناققا قاتىساتىن ەرىكتىلەردىڭ قاۋىپسىزدىگىنە كەپىلدىك بەرەدى»، - دەيدى ينستيتۋت ديرەكتورى كۇنسۇلۋ زاكاريا.

ينستيتۋت باسشىسىنىڭ ايتۋىنشا قازاقستاندىق ۆاكتسينانى وزدەرىنە سىناعان عالىمداردىڭ بىرنەشە تاۋلىك وتكەننەن كەيىن وزدەرىن سەزىنۋى جاقسى، دەنە قىزۋى مەن اللەرگياسى جوق. ەسكە سالا كەتسەك بۇعان دەيىن قازاقستاندىق بەس عالىمنىڭ COVID-19-عا قارسى جاساعان ۆاكتسينانى وزدەرىنە سىناپ كورگەنىن حابارلاعان ەدىك. ينستيتۋتتىڭ حابارلاۋىنشا COVID-19-عا قارسى QazCovid-in ۆاكتسيناسىن ينستيتۋتتىڭ باس ديرەكتورى ك. زاكاريا جانە عىلىمي قىزمەتكەرلەر: ل. قۇتىمبەتوۆ، ب. حايرۋللين، م. ورىنبايەۆ، ق. سۇلتانقۇلوۆ، ە. ءابدىرايىموۆ، س. نۇرابايەۆ وزدەرىنە سىناعان.