قازاقستاندا COVID-19 دان ءوزىن ونلاين دياگنوستيكالاۋ قىزمەتى ىسكە قوسىلدى
قىزمەتتىڭ بۇل ءتۇرى ق ر دەنساۋلىق ساقتاۋ مينيسترلىگى مەن «ۇلتتىق اقپاراتتىق تەحنولوگيالار» ا ق بىرلەسكەن جۇمىسىنىڭ ناتيجەسىندە جاسالدى.
«كوروناۆيرۋستىڭ بەلگىلەرىن انىقتاۋ بويىنشا ءوزىن ءوزى ونلاين دياگنوستيكالاۋ قىزمەتى eGovMobile قوسىمشاسىنىڭ باستى بەتىندە «COVID-19 بەلگىلەرى بويىنشا ساۋالناما» اتاۋىمەن جەكە باتىرما رەتىندە ورنالاسقان. قىزمەت ءۇش تىلدە (قازاقشا، ورىسشا، اعىلشىنشا) قولجەتىمدى. ساۋالنامانى تولتىرۋ ءۇشىن ازاماتتار 12 سۇراققا ءيا/جوق دەپ جاۋاپ بەرەدى، قاجەت بولعان جاعدايدا جەكە اقپاراتتاردى ەنگىزەدى. تولتىرىپ بولعاننان كەيىن «ساۋالنامانى جىبەرۋ» باتىرماسىن باسۋ كەرەك»، دەلىنگەن حابارلامادا.
اقپارات ارى قاراي وڭدەۋدەن ءوتۋ ءۇشىن ق ر دەنساۋلىق ساقتاۋ مينيسترلىگىنە تۇسەدى. سونىمەن قاتار، ازاماتتار eGovMobile ارقىلى «COVID-19 كارتاسى»، «COVID-19 تۋرالى FAQ» قىزمەتتەرىنەن كوروناۆيرۋس تۋرالى ءجيى قويىلاتىن سۇراقتارعا جاۋاپ الا الادى. سونداي-اق موبيلدى قوسىمشا ناقتى ۋاقىت رەجيمىندە قازاقستان اۋماعىنداعى ۆيرۋستىڭ تارالۋ جاعدايى مەن ىندەتى راستالعاندارمەن قاتىناستا بولعاندار جايلى وزەكتى اقپاراتتاردى ۇسىنادى.