BUU Bas Assambleıasynyń 73-shi sessıasy óz jumysyn bastady
Jalǵasyp kele jatqan janjaldar, saıası teketires, keıbir shıelenisýdiń oshaqtaryndaǵy ushyǵyp jatqan gýmanıtarlyq daǵdarys BUU basshylarynyń narazylyǵyn týǵyzady.
Sessıanyń taqyryby - «BUU-ny barlyq adamdardyń múddelerine jaqyndatý: beıbit, ádiletti jáne turaqty qoǵamdy qoldaýdaǵy jahandyq jetekshilik pen ortaq jaýapkershilik».
BUU Bas Assambleıasy 73-shi sessıasynyń negizgi basymdyqtary retinde Uıymdy odan ári reformalaý, janjaldardy boldyrmaý, adam quqyqtaryn qamtamasyz etý, genderlik teńdik jáne álemdegi ádiletsizdikti eńserý máseleleri tańdap alyndy.
Sessıanyń kún tártibinde halyqaralyq beıbitshilik pen qaýipsizdikti qamtamasyz etý, turaqty damý, adam quqyqtary, gýmanıtarlyq kómek, qarýsyzdaný, sot tóreligin nyǵaıtý jáne halyqaralyq quqyqty damytý sıaqty salalarda 175-ten astam másele qamtyldy.
Ekvadordyń Syrtqy ister jáne kóshi-qon mınıstri Marıa Fernanda Espınosa Garses aǵymdaǵy sessıada Bas Assambleıanyń Tóraǵasy bolyp saılandy. Bir jylǵa sozylatyn tóraǵalyq kezeńinde ol kóshi-qon, qorshaǵan ortany qorǵaý, múgedekterdiń quqyqtary, genderlik teńdik jáne turaqty damýdy nasıhattaý máselelerine basa nazar aýdarýdy josparlaıdy.
Bas Assambleıanyń jumysynda ekonomıkalyq damýǵa járdemdesý jáne kóshi-qon jáne bosqyndar týraly jahandyq kelisimderdi qabyldaý taqyryby da mańyzdy oryn alady.
Jańa sessıanyń alǵashqy kúnderinde Assambleıanyń alty negizgi komıtetine kún tártibindegi máselelerdi bólýge qatysty máseleler qarastyrylady. Jyl saıynǵy jalpy pikirtalas 25 qyrkúıekte bastalyp, 1 qazanǵa deıin jalǵasady.
BUU Bas Assambleıasynyń jalpy debattaryna Syrtqy ister mınıstri Qaırat Ábdirahmanov bastaǵan Qazaqstan Respýblıkasynyń delegasıasy qatysady. 24-29 qyrkúıek aralyǵynda kópjaqty jáne ekijaqty formattaǵy birqatar is-sharalar josparlanǵan. Qazaqstan Syrtqy ister mınıstriniń sóz sóıleýi 28 qyrkúıekke josparlanǵan.
Assambleıa sessıasynda Qazaqstan úshin basty oqıǵa - «Terrorızmnen azat álemge qol jetkizý» minez-qulyq kodeksiniń tanystyrylymy. Qujat Qazaqstan Respýblıkasynyń Prezıdenti Nursultan Nazarbaevtyń bastamasymen jasaldy. Kodekstiń negizgi maqsaty - 2045 jyly BUU-nyń júz jyldyǵyna oraı terrorızmge qarsy kúres jáne terrorızmnen erkin álemge qol jetkizý boıynsha seriktes elderdiń keń halyqaralyq koalısıasyn qurý.
Qazaqstan delegasıasynyń kópjaqty formatta ótetin túrli kezdesýlerge qatysýy kútilýde Atap aıtqanda BUU Bas Assambleıasynyń 73-shi sessıasynyń jalpy debattarynyń ashylýy; Azıadaǵy ózara is-qımyl jáne senim sharalary jónindegi keńestiń (AО́SSHK) syrtqy ister mınıstrleriniń beıresmı kezdesýi jáne QHR-dan Tájikstanǵa tóraǵalyqty tapsyrý; Ujymdyq qaýipsizdik sharty uıymyna (UQSHU) múshe elderdiń syrtqy ister mınıstrleriniń kezdesýi; Iаdrolyq qarýdy tolyq joıýǵa qarsy kúres halyqaralyq kúnine arnalǵan joǵary deńgeıdegi kezdesý; BUU Qaýipsizdik Keńesiniń qyzmeti boıynsha birqatar otyrystar; Ekonomıkalyq yntymaqtastyq uıymy Mınıstrler keńesiniń beıresmı kezdesýi; Teńizge shyǵý joly joq damýshy elder toby memleketteriniń mınıstrler kezdesýi; BUU О́rkenıetter Alıansynyń dostary tobynyń mınıstrler kezdesýi.
AQSH tóraǵalyǵymen, sondaı-aq Prezıdent Donald Tramp pen Memlekettik hatshy Maıkl Pompeonyń qatysýymen BUU Qaýipsizdik Keńesiniń birqatar ashyq otyrystary ótedi. 2017-2018 jyldary Qazaqstan - atalǵan Keńestiń turaqty emes múshesi.
Bitimgershilik, bilim berý, mádenıet, densaýlyq saqtaý salalardaǵy birqatar mańyzdy is-sharalar, atap aıtqanda, týberkýlezdi joıý jónindegi joǵary deńgeıdegi kezdesýler nazar aýdarady. BUU shtab-páterinde Shyńǵys Aıtmatovtyń 90-jyldyq mereıtoıyna arnalǵan saltanatty kórmeniń ashylýy josparlanýda.
Sonymen qatar, Q. Ábdirahmanov BUU resmı ókilderi, syrtqy ister mınıstrleri, amerıkalyq jáne halyqaralyq bıznes ókilderimen birqatar ekijaqty kezdesýler ótkizedi.
Jalpy alǵanda, BUU Bas Assambleıasynyń sessıasy QR Prezıdenti N. Nazarbaevtyń Turaqty damý maqsattaryna qol jetkizý jáne BUU-nyń 2030 kún tártibiniń sheńberinde taratpaý jáne qarýsyzdaný, bitimgershilik, turaqty áleýmettik-ekonomıkalyq damý salalaryndaǵy birqatar syrtqy saıası bastamalaryn ilgeriletýge múmkindik beredi.