BBC راديوسىندا قازاق مۋزىكاسى شىرقالدى
«تۋرا اتا زاڭنىڭ ءتول مەرەكەسى كۇنى BBC radio 3-كە ارناپ جاساعان قازاق مۋزىكاسى تۋرالى «Music Planet: Road Trip» حابارىم اۋە تولقىنىنا شىقتى. وسىنداي مۇمكىندىكتى بەرگەن، بىرىنشىدەن، اللاعا مىڭ دا ءبىر شۇكىر. ەكىنشىدەن، سەنىپ تاپسىرعان BBC- لىك ارىپتەستەرىمە، دانەكەر بولعان قازاقستاننىڭ ۇلى بريتانيا كورولدىگى/لوندونداعى ەلشىلىگىنە، ارنايى ايگەرىمگە، اعىلشىنشا ۇيرەنىپ، حابار جاساي الاتىن دەڭگەيگە جەتۋىمە مۇمكىندىك بەرگەن ەلباسىمىز نۇرسۇلتان نازاربايەۆتىڭ «بولاشاق» باعدارلاماسىنا مىڭ العىس»، - دەپ جازدى ول ءوز پاراقشاسىندا.
«Music Planet: Road Trip» حابارىندا جادىرا جۇماكۇلباي قازاق مۋزىكا ونەرى، ۇلتتىق اسپاپتار جايلى بايان ەتەدى. قازاق ءان ونەرىنىڭ ارقا، سىر، جەتىسۋ مەكتەبى بارىن ايتادى.
سونىمەن بىرگە، اتالمىش راديوحابار تۋرالى ۇلى بريتانياداعى قازاقستان ەلشىلىگى دە Facebook پاراقشاسىندا ءبولىسىپ، قازاق مۋزىكاسىن تىڭداۋعا شاقىردى.
ايتا كەتسەك، BBC Radio 3 - تىڭدارمان قاۋىمعا كلاسسيكالىق مۋزىكا مەن وپەرا تۋىندىلارىن، دجاز بەن الەمدىك مۋزىكالاردى سۋسىنداتاتىن الەمدىك راديوستانتسيا. راديوستانتسيا ءوزىن الەمگە «جاڭا مۋزىكانىڭ ەڭ سالماقتى كوميسسارى» رەتىندە تانىستىرادى. BBC Radio 3 بارلىق ۇلتتاردىڭ مۋزىكاسىن الەمگە پاش ەتۋدى كوزدەيدى.