Balalardy shetelge alyp shyǵý úshin ne isteý kerek

AQTО́BE. QazAqparat - Aqtóbede jazǵy demalys kezinde balalarymen shetelge baratyn otbasylar sany artady. Polıtsıada balalarǵa shetelge shyǵý qujat rásimdeý erejeleri týraly aıtyldy, dep habarlaıdy QazAqparat tilshisi.

«Shetelge balalarmen shyǵatyn kezde azamattar tólqujattarymen halyqqa qyzmet kórsetý ortalyqtaryna barýy kerek. Ol jerde tólqujattarǵa 16 jasqa deıingi balalardyń sýretterin jabystyryp beredi. Azamattar tólqujattyń túpnusqasyn, balalardyń týý týraly kýálikteri men 3,4x4,5 sýretterin usynyp, sondaı-aq memlekettik baj salyǵyn tóleýi qajet. Qyrǵyzstanǵa rásimdeý basqasha júrgiziledi. HQO-da tegin beriletin qosymsha anyqtama qaǵazyn rásimdeý kerek», - dep túsindirdi IID baspasóz hatshysy Erbolat Sarqulov.

Shetelge shyǵý qujattaryn rásimdeý 2 kún ýaqyt alady. Sondyqtan, demalysty josparlaý kezinde osyny eskerý qajet, dedi polıtsıada.