Astana janyndaǵy patsha qorǵanynda qazba jumystary bastaldy

ASTANA. QazAqparat - «Rýhanı jańǵyrý» memlekettik baǵdarlamasyn júzege asyrý aıasynda Astana qalasy ákimdiginiń bastamasymen elordanyń janyndaǵy patsha qorǵanynda qazba jumystary qolǵa alyndy, dep habarlaıdy QazAqparat qalalyq mádenıet jáne sport basqarmasyna silteme jasap.

Bul qorǵan qazirgi zamanǵy megapolıstiń aýmaǵynda saq dáýirinde de tirshiliktiń bolǵanyna dálel bola alady.

Qorymdy zertteý jumystaryn úılestirýshi - Astana qalasynyń mádenıet jáne sport basqarmasy. Qazba jumystaryn L.N.Gýmılev atyndaǵy Eýrazıa ulttyq ýnıversıtetiniń Esil arheologıalyq ekspedıtsıasy júrgizedi. Arheologtar eki apta boıy tynymsyz eńbek etýde. Zertteý jumystary barysynda qorǵannyń joǵarǵy qabatyndaǵy bastapqy 7 qabir (ıaǵnı, eń ertedegi) ashyldy. Jerleý rásimi boıynsha zırattar 15-16 ǵǵ. jatqyzyldy. Aıta keteıik, olar musylman dástúrimen jasalǵan. Eki moladan áshekeıler tabyldy, onyń ishinde qola syrǵa men kúmis jip te bar. Al qyzdyń qabirinen neke júzigi tabyldy. Ol ony oń qolyna kıgen eken.

Qorǵan Qaraǵandyǵa baratyn jolda Kúıgenjar shatqalynda ornalasqan. Qazirgi kezde saqtar qorǵanynyń shetinde qazaq zıraty bar.

Taspen jabylǵan qorǵannyń bıiktigi 4 m, dıametri - 60m. Onyń granıt plıtalary Nura ózeniniń jaǵasynan alynǵany belgili.