«Astana arlandary» tórtinshi márte chempıondyq ataqqa talasady
QR Boks federasıasynyń baspasóz qyzmeti habarlaýynsha «Astana Arlans» WSB fınalyna tolyqtaı daıyn. Fınal Qytaı Halyq Respýblıkasynyń ońtústik shyǵysynda ornalasqan Sıamyn qalasy men Szınszıan óńirinde ótedi. Toptyq kezeńde qarsylas shaq keltirmegen «Astana Arlans» pen «Kýba Domadores» komandalary 26-28 qyrkúıek aralyǵynda ózara myqtyny anyqtaıdy. Qos qurama boksshylary osyǵan deıin úsh ret kezdesip, eki márte qazaq komandasy basym tússe, bir ret kýbalyqtardyń mereıi ústem bolǵan. «Astana Arlandary» mamyr aıynda «Brıtısh Laınhartstty» utsa, «Kýba Domadores» «Frans Faıtıng Rýstersty» jeńdi.
WSB halyqaralyq boks qaýymdastyǵy AIBA (Amateur International Boxing Association - Halyqaralyq Áýesqoı Boks Qaýymdastyǵy) uıymyna tıesili qurylym. Onyń aıasynda ótetin álemdik týrnır 2010 jyldan bastaý alǵan. Jarysqa ár eldiń komandalary qatysady. «Astana Arlandary» ázirge osy baıraqty básekede 3 ret jeńiske jetken jalǵyz komanda.
Al «Kýba Domadores» bolsa 2 ret bas júldege qol jetkizgen. Italıalyq «Dolce & Gabbana» men fransýzdyń «France Fighting Roosters» quramalary bir retten jeńgen.
Atalmysh týrnırge qatysatyn sportshylardyń barlyǵy áýesqoı boksshylar. Biraq ádette el birinshiliginde, Olımpıada oıyndarynda biz kórip júrgen bokstan aıyrmashylyǵy boksshylar kásipqoı bokstaǵy sıaqty keýdelerine eshteme kımeı shyǵady jáne bastaryn qorǵaıtyn shlemdi taqpaıdy.
WSB halyqaralyq qaýymdastyǵy ózin áýesqoı boks dárejesindegi uıym sanaǵanymen boksshylarǵa kásipqoı boksta da óner kórsetýge shekteý qoımaıdy. Sonymen qatar, sportshylarǵa olımpıada oıyndaryna da qatysýǵa ruqsat berilgen. Al qazylyq jaǵynan keletin bolsaq, áýesqoı bokstan aıyrmashylyǵy bar. Týrnır jeńimpazyn kásipqoı bokstaǵy sıaqty úsh tóreshiniń bergen baǵasynyń nátıjesine qarap anyqtaıdy.