بەردىبەك ساپاربايەۆتىڭ پرەزيدەنت تەلەراديوكەشەنىنە بەرگەن سوڭعى سۇحباتى

استانا. قازاقپارات - بۇگىن مەملەكەت جانە قوعام قايراتكەرى بەردىبەك ساپاربايەۆ ومىردەن وزدى.

مەملەكەت قايراتكەرىنىڭ سوڭعى سۇحباتى بيىلعى اقپان ايىندا پرەزيدەنت تەلەراديوكەشەنىندە جاريالانعان ەدى. قازاقپارات اگەنتتىگى بەردىبەك ساپاربايەۆتىڭ وسى سۇحباتىنان ءۇزىندى ۇسىنادى.

سۇحبات بارىسىندا بەردىبەك ماشبەك ۇلىنا «جالپى وسىعان دەيىن شەتەل اسقان زاڭسىز قارجى اكتيۆتەرى قازىر مەملەكەت باسشىسىنىڭ تىكەلەي تاپسىرماسىمەن ەلگە قايتارىلىپ جاتىر. وسىعان قاتىستى ءسىزدىڭ جەكە پىكىرىڭىز قانداي؟» دەگەن ساۋال قويىلادى.

«شەتەل اسقان زاڭسىز قارجى اكتيۆتەرىن ەلگە قايتارعان دۇرىس. ويتكەنى، ول حالىقتىڭ قارجىسى، سوندىقتان مەملەكەتتىڭ مەنشىگىنە قايتارىلۋى كەرەك. مەملەكەت باسشىسىنىڭ تىكەلەي تاپسىرماسىمەن قۇرىلعان ارنايى كوميسسيا بار. باس پروكۋراتۋرا باستاعان قۇزىرلى ورگاندار شەتەل اسقان اكتيۆتەردىڭ زاڭدىلىعىن تەكسەرىپ، قاراۋى كەرەك. پرەزيدەنت شەتەلدەن قايتارىلعان قارجىعا مەكتەپتەر مەن باسقا دا الەۋمەتتىك نىساندار سالامىز دەدى، ونىسى ءجون. حالىقتىڭ ماسەلە نەگە تەز شەشىلمەيدى دەپ سۇراۋى دا دۇرىس»، - دەپ جاۋاپ بەردى بەردىبەك ساپاربايەۆ.

مەملەكەت قايراتكەرىنىڭ ايتۋىنشا، الەۋمەتتىك ماسەلەلەر تەك قازاقستانعا عانا ءتان ەمەس.

«قاي مەملەكەتتىك الساق تا، ءتىپتى دامىعان ا ق ش نەمەسە ەۋروپا ەلدەرىن الايىقشى - الەۋمەتتىك ماسەلەلەر بارىندە بار. ونى شەشۋگە ۋاقىت جانە دۇرىس ۇيىمداستىرۋ جۇمىسى كەرەك. قازىر كوتەرىلىپ جاتقان ماسەلەلەر حالىقتىڭ ءال- اۋقاتىن جاقسارتۋعا ارنالعان. ونى جاۋاپكەرشىلىكپەن ورىنداۋ بيلىك وكىلدەرىنە بايلانىستى»، - دەيدى ب. ساپاربايەۆ.

بۇگىن بەلگىلى بولعانداي بەردىبەك ساپاربايەۆ 70 جاسىندا ومىردەن ءوتتى.

مەملەكەت باسشىسى بەردىبەك ساپاربايەۆتىڭ وتباسى مەن جاقىن تۋىستارىنا كوڭىل ايتتى.