15:49, 10 - ماۋسىم 2023 | GMT +6
سەمەي ورمانىنداعى ءورت: قازا تاپقان ءۇش ورمانشىنىڭ اتى- ءجونىن انىقتاۋ مۇمكىن بولماي تۇر
استانا. قازاقپارات - توتەنشە جاعدايلار مينيسترلىگى ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ Jibek Joly تەلەارناسىنا بەرگەن سۇحباتىندا سەمەيدەگى ورمان ءورتىن ءسوندىرىپ ءجۇرىپ مەرت بولعانداردىڭ كىم ەكەنى ءالى انىقتالماعانىن ايتتى، دەپ حابارلايدى قازاقپارات ءتىلشىسى.
«ورتتەن 3 ادام قازا تاپتى دەپ جاتىر، ءبىراق ازىرگە ولاردىڭ كىم ەكەنىن انىقتاۋ مۇمكىندىگى تۋىپ جاتقان جوق. ىشكى ىستەر مينيسترلىگى مەن پوليتسيا دەپارتامەنتى ماماندارى ارنايى جۇمىس جۇرگىزىپ جاتىر. ورتەلگەن تەحنيكانىڭ قالدىقتارى تابىلىپ جاتىر، دەگەنمەن ادام شىعىنىنا قاتىستى ناقتى جاعداي بەيمالىم. الدىمەن ءمان- جايدى بىلەيىك، سوسىن تولىق مالىمەت بەرەمىز دەگەن ويدامىن»، - دەدى نۇربولات دەربىسوۆ Jibek Joly تەلەارناسىنا بەرگەن سۇحباتىندا.
سپيكەر اپتاپ ىستىق، قاتتى جەل جانە ورمان ىشىنە كىرۋدە كەدەرگى بارىن تاعى دا ەسكە سالدى.
«قازىر تىكۇشاق سانىن كوبەيتتىك، ولار ءتيىمدى جۇمىس ىستەپ جاتىر. ماماندار جانە تەحنيكا جەتكىلىكتى، تەك جۇمىستى دۇرىس باعىتتا ۇيىمداستىرا ءبىلۋ كەرەك»، - دەيدى ول.