اپتاپ ىستىق پەن جەل اباي وبلىسىنداعى ءورتتى سوندىرۋگە كەدەرگى جاساپ وتىر

استانا. قازاقپارات - اباي وبلىسىنداعى ورمان ورتىنە قاتىستى سوڭعى مالىمەت جاريالاندى، دەپ حابارلايدى قازاقپارات ءتىلشىسى.

«اباي وبلىسى سەمەي رەزەرۆاتىنداعى ورمان ءورتى بويىنشا قازىر جاعداي تۇراقتى. تاڭ اتقالى ءورتتى بارلاۋ جۇمىسى ءجۇرىپ جاتىر. قازىر ءتىلسىز جاۋمەن كۇرەسكە 8 تىكۇشاق جۇمىلدىرىلىپ، ءورت ءسوندىرىلىپ جاتىر»، - دەيدى توتەنشە جاعدايلار مينيسترلىگى ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ.

ونىڭ ايتۋىنشا، جۇمىس بارىسىنا كۇننىڭ ىستىعى، جەل كەدەرگى كەلتىرىپ، ورماننىڭ ىشكى جاعىنا كىرۋدە قيىندىق بار.

«ءورت ءسوندىرۋ جۇمىسىنا بارلىق قۇزىرلى مەكەمەلەر تارتىلدى. ونىڭ ىشىندە جەرگىلىكتى اتقارۋشى ورگاندار، ورمان شارۋاشىلىعى ماماندارى، قورعانىس مينيسترلىگىنىڭ جەكە قۇرامى، تاعى باسقالار بار»، - دەيدى ورتكە قارسى قىزمەت كوميتەتىنىڭ باسشىسى.

اباي وبلىسىنىڭ اكىمى نۇرلان ۇرانحايەۆ «شىعىس» وڭىرلىك قولباسشىلىعىنان قوسىمشا 200 اسكەري قىزمەتشى مەن 8 تەحنيكا وتپەن كۇرەسكە جىبەرىلگەنىن اتاپ ءوتتى.

«پرينەبەسنوە، ۋسپەنكا، كاشتاك، تاليتسا اۋىلدارىندا ءورت ءسوندىرۋ جالعاسىپ جاتىر. جەتىسۋ، الماتى، قىزىلوردا وبلىستارىنان، الماتى جانە قاراعاندى قالالارىنان قوسىمشا كۇش كەلەدى. بۇگىن تاڭەرتەڭ «شىعىس» وڭىرلىك قولباسشىلىعىنان 200 اسكەري قىزمەتشى مەن 8 تەحنيكا جۇمىلدىرىلدى. جەدەل شتاب تاۋلىك بويى جۇمىس ىستەپ تۇر. سونىمەن قاتار وبلىستىق جانە رەسپۋبليكالىق شتابتا جەدەل جەلى ۇيىمداستىرىلعان. تاڭعى ساعات 7 دە اەروۆيزۋالدى بارلاۋ جۇرگىزىلدى»، - دەدى اباي وبلىسىنىڭ اكىمى نۇرلان ۇرانحايەۆ.

ەسكە سالا كەتەيىك، «سەمەي ورمانى» رەزەرۆاتىندا 8-ماۋسىم كۇنى ءورت شىققان بولاتىن.

كەيىنىرەك سەمەي ورمانىنداعى ءورتتى سوندىرۋگە جۇمىلدىرىلعان 3 مامان قازا تاپتى.

مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە اباي وبلىسىنداعى وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەدى. ۇكىمەتكە جانە اباي وبلىسىنىڭ اكىمدىگىنە قازا تاپقان ورمان شارۋاشىلىعى قىزمەتكەرلەرىنىڭ وتباسىلارىنا بۇكىل كومەكتى كورسەتۋدى تاپسىردى.

سونداي- اق سەمەي قالاسىندا جەرگىلىكتى اۋقىمدا تابيعي سيپاتتاعى توتەنشە جاعداي رەجيمى جاريالاندى.

اباي وبلىسىنداعى ورتكە بايلانىستى جەدەل جەلى اشىلدى.

مەملەكەت باسشىسى قاسىم- جومارت توقايەۆتىڭ 11-13-ماۋسىم كۇندەرى ۆەتنامعا جوسپارلانعان رەسمي ساپارى كەيىنگە شەگەرىلدى.