قاسىم- جومارت توقايەۆ ۇكىمەتكە اباي وبلىسىنداعى ورتكە قولدا بار بارلىق رەسۋرستاردى جۇمىلدىرۋدى تاپسىردى

استانا. قازاقپارات - پرەزيدەنت قاسىم- جومارت توقايەۆ ۇكىمەتكە اباي وبلىسىنداعى ءورتتى ءسوندىرۋ، سونداي- اق اپات اۋقىمىنىڭ كەڭەيۋىنە جول بەرمەۋ جانە ازاماتتار مەن ولاردىڭ مۇلكىنىڭ قاۋىپسىزدىگىن قامتاماسىز ەتۋ ءۇشىن قولدا بار بارلىق تەحنيكالىق جانە ادامي رەسۋرستاردى جۇمىلدىرۋدى تاپسىردى.

ءورتتى سوندىرۋگە قورعانىس مينيسترلىگىنىڭ بولىمشەلەرى تارتىلدى.

ەسكە سالايىق، ازداعان ۋاقىت بۇرىن سەمەي قالاسىندا جەرگىلىكتى اۋقىمدا تابيعي سيپاتتاعى توتەنشە جاعداي رەجيمى جاريالاندى.

«سەمەي» ورمانى رەزەرۆاتىندا ءورت 8-ماۋسىم كۇنى شىققان بولاتىن. «ءورت نايزاعايدىڭ 2 رەت سوعۋىنان شىققان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ «سەمەي ورمانى» مەملەكەتتىك ورمان تابيعي رەزەرۆاتى تەحنيكاسى بيىك قۇم توبەلەرى ورنالاسقان ايماققا جەتە المادى»، - دەگەن بولاتىن اباي وبلىسى اكىمىنىڭ ورىنباسارى ديميتري گاريكوۆ.

كەيىنىرەك سەمەي ورمانىنداعى ءورتتى سوندىرۋگە جۇمىلدىرىلعان 3 مامان قازا تاپتى. مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە اباي وبلىسىنداعى وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەدى. ۇكىمەتكە جانە اباي وبلىسىنىڭ اكىمدىگىنە قازا تاپقان ورمان شارۋاشىلىعى قىزمەتكەرلەرىنىڭ وتباسىلارىنا بارلىق قاجەت كومەكتى كورسەتۋدى تاپسىردى.

اباي وبلىسىنداعى ورتكە بايلانىستى جەدەل جەلى اشىلدى.

مەملەكەت باسشىسى قاسىم- جومارت توقايەۆتىڭ 11-13-ماۋسىم كۇندەرى ۆەتنامعا جوسپارلانعان رەسمي ساپارى كەيىنگە شەگەرىلدى.