ەرىكتىلەر اباي وبلىسىنداعى ءورت سوندىرۋشىلەرگە كومەكتەسىپ جاتىر

ەرىكتىلەر اباي وبلىسىنداعى ورمان ورتىمەن كۇرەسىپ جاتقان ماماندارعا كومەك كورسەتىپ جاتىر.

بۇل تۋرالى وبلىس اكىمدىگىنىڭ باسپا ءسوز قىزمەتىنەن مالىمدەدى دەپ حابارلايدى قازاقپارات.

ءورت ءسوندىرۋ بريگادالارىنا قولداۋ كورسەتۋ ءۇشىن ەرىكتىلەر اۋىلدىق وكرۋگتەردەن ىستىق تاماق دايىنداپ، اكەلىپ جاتىر.

«جەرگىلىكتى كاسىپكەرلەردىڭ قولداۋىمەن بۇگىندە 1000 ليتر تازا اۋىز سۋ، 200 ك گ قوي ەتى، 200 ك گ جارما، 5 قوراپ كونسەرۆى، 1000 نان ءونىمى، 50 ك گ پياز جانە باسقا دا قاجەتتى ونىمدەر قامتاماسىز ەتىلدى. سونىمەن قاتار، جەرگىلىكتى اتقارۋشى ورگاندار 4 توننا اۋىز سۋ بەردى. بەيجاي قارامايتىن ازاماتتار ءورت سوندىرۋشىلەرگە اۋىز سۋ، پلاستيكالىق ىدىس- اياق، ازىق- تۇلىك جانە جەكە كۇتىم قۇرالدارىن ۇسىنۋدا. ەرىكتىلەر بورودۋليحا جانە ۋسپەنكا اۋىلدارىندا ورنالاسقان دالالىق اسۇيلەردىڭ جۇمىسىن قولدايدى»، - دەپ جازىلعان حابارلامادا.

ىستىق تاماقتى ۇزدىكسىز جەتكىزۋ ءۇشىن 80 گە جۋىق ەرىكتى كومەككە كەلگەن. سەمەي قالاسىنىڭ تۇرعىندارى بۇل جاعدايدان تىس قالمادى. ايتا كەتۋ كەرەك، ءورت ايماعىندا تەك ارنايى دايىندالعان ماماندار جۇمىس ىستەپ جاتىر. قازىر قوسىمشا جۇمىس كۇشىنە قاجەتتىلىك جوق.

ەسكە سالايىق، بۇگىن سەمەي ورمانىنداعى ءورتتى سوندىرۋگە جۇمىلدىرىلعان 14 مامانمەن بايلانىس ۇزىلگەن بولاتىن. كەيىن 3 قىزمەتكەردىڭ قازا تاپقانى انىقتالدى.

مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەپ، كوز جۇمعان ورمان شارۋاشىلىعى قىزمەتكەرلەرىنىڭ وتباسىلارىنا قاجەتتى كومەك كورسەتۋدى تاپسىردى.

«سەمەي» ورمانى رەزەرۆاتىندا ءورت 8-ماۋسىم كۇنى شىققان بولاتىن.

اباي وبلىسى اكىمىنىڭ ورىنباسارى ديميتري گاريكوۆتىڭ ايتۋىنشا، ءورت 2 رەت تۇسكەن نايزاعايدان تۇتانعان.