اباي وبلىسىنداعى ءورت: قاسىم- جومارت توقايەۆتىڭ ۆەتنامعا رەسمي ساپارى كەيىنگە شەگەرىلدى
بۇل تۋرالى اقوردانىڭ Telegram كانالىنان ءمالىم بولدى، دەپ حابارلايدى قازاقپارات.
پرەزيدەنت شۇعىل كەڭەس وتكىزۋ جانە اپاتتان زارداپ شەككەن ازاماتتارعا كومەك كورسەتۋ شارالارىن قابىلداۋ ءۇشىن اباي وبلىسىنا بارۋدى جوسپارلاپ وتىر.
ەسكە سالايىق، ازداعان ۋاقىت بۇرىن سەمەي قالاسىندا جەرگىلىكتى اۋقىمدا تابيعي سيپاتتاعى توتەنشە جاعداي رەجيمى جاريالاندى.
«سەمەي» ورمانى رەزەرۆاتىندا ءورت 8-ماۋسىم كۇنى شىققان بولاتىن. «ءورت نايزاعايدىڭ 2 رەت سوعۋىنان شىققان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ «سەمەي ورمانى» مەملەكەتتىك ورمان تابيعي رەزەرۆاتى تەحنيكاسى بيىك قۇم توبەلەرى ورنالاسقان ايماققا جەتە المادى»، - دەگەن بولاتىن اباي وبلىسى اكىمىنىڭ ورىنباسارى ديميتري گاريكوۆ.
كەيىنىرەك سەمەي ورمانىنداعى ءورتتى سوندىرۋگە جۇمىلدىرىلعان 3 مامان قازا تاپتى. مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە اباي وبلىسىنداعى وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەدى. ۇكىمەتكە جانە اباي وبلىسىنىڭ اكىمدىگىنە قازا تاپقان ورمان شارۋاشىلىعى قىزمەتكەرلەرىنىڭ وتباسىلارىنا بارلىق قاجەت كومەكتى كورسەتۋدى تاپسىردى.
اباي وبلىسىنداعى ورتكە بايلانىستى جەدەل جەلى اشىلدى.