وزگەرىستەن قورىقپاڭىز! قالاي باتىل بولۋعا بولادى؟

استانا. قازاقپارات - قورقىنىش پەن باتىلسىزدىق - اعزانىڭ قالىپتى رەاكسياسى. سەبەبى بۇل سەزىمدەرسىز ادامزاتقا قاۋىپ تونەر ەدى. ءبىراق ءومىر بويى باتىلسىز بولىپ جۇرۋگە دە بولمايدى.

جىلدام شەشىم قابىلداي الماۋ پسيحولوگيالىق پروبلەمالارعا، مۇمكىندىكتەردەن ايىرىلىپ قالۋعا جانە دەگراداتسياعا ۇشىراۋعا اكەلۋى مۇمكىن. قالاي باتىل بولۋعا جانە ءومىردى جاقسى جاعىنا وزگەرتۋگە بولادى؟

ءمىنسىز ناتيجەگە جەتۋگە تىرىسپاڭىز

كەي ادامدار جۇمىسىن ءمىنسىز ەتپەيىنشە، قانداي دا ءبىر ارەكەتىن كەيىنگە قالدىرا بەرەدى. ءبىراق كەيدە ءبىز كەمەلدىككە ۇمتىلامىز دەپ ۋاقىت جوعالتامىز جانە ءوز دامۋىمىزدى تەجەيمىز.

ماڭىزدى نارسەگە نازار اۋدارىپ ۇيرەنىڭىز

باتىلدىق - ادامعا ماڭىزدى شەشىمدەردى جىلدام قابىلداۋعا مۇمكىندىك بەرەتىن قابىلەت. ەگەر بۇل قابىلەتتى دامىتقىڭىز كەلسە، باسىڭىزدى ارتىق ويلاردان بوساتىپ، ماڭىزدى تاپسىرمالارعا نازار اۋدارىپ ۇيرەنۋىڭىز كەرەك.

قورقىنىشتارىڭىزبەن كۇرەسىڭىز

ول ءۇشىن فوبيالارىڭىزدىڭ ءتىزىمىن جاساڭىز جانە ولاردىڭ ءارقايسىسىنا قارسى تۇرۋعا تىرىسىڭىز. مىسالى، ۇساق جاندىكتەردەن قورقاتىن بولساڭىز، ولار جايلى ماعلۇمات وقىڭىز نەمەسە مۇراجايدان بارىپ كورىڭىز.

ورتاڭىزدى كەڭەيتىڭىز

جاڭا تانىستارمەن سويلەسۋگە اشىق ادامدار باتىلىراق بولىپ كەلەدى. جاڭا تانىستارمەن ارالاسۋ شىنىمەن دە ءسىزدى باتىلىراق ەتۋى مۇمكىن. اسىرەسە، تابىستى، ساياحاتتى جاقسى كورەتىن نەمەسە ءبىلىمقۇمار ادامدار ورتاسىنا تۇسسەڭىز، ولار سىزگە ۇلگى بولا الادى.

«جوق» دەگەن جاۋاپتى قابىلداپ ۇيرەنىڭىز

باتىل ادامدار ويلاعانىنىڭ بولماي قالۋىنان قورىقپايدى. ولار ونىڭ ءوتىنىشى بىرەۋگە ىڭعايسىز بولۋى مۇمكىن ەكەنىن تۇسىنەدى، ءبىراق ءوز باعىن سىناپ كورۋدەن قورىقپايدى. سوندىقتان باتىلىراق بولۋ ءۇشىن ءوز قاجەتتىلىكتەرىڭىز جايلى ايتىپ ۇيرەنىپ قانا قويماي، «جوق» دەگەن جاۋاپتى ەستۋگە دە دايىن بولۋ كەرەك. باسقا ادام باس تارتسا، ءسىز تۇلعا رەتىندە ناشارلاي تۇسپەيسىز. ادامدار ءارتۇرلى جانە ولاردىڭ قىزىعۋشىلىقتارى دا ءارتۇرلى بولۋى مۇمكىن ەكەنىن ەستە ساقتاڭىز.

ءوزىڭىزدى ماقتاڭىز

ماقتاۋ - باتىل بولۋعا كومەكتەسەتىن موتيۆاتسيانىڭ ءبىر ءادىسى. ماقتاۋ ۇزاقمەرزىمدى ارتىقشىلىقتار بەرەدى. ءوز جەتىستىكتەرىڭىزدى ەسكەرىپ وتىرساڭىز، ءوزىن-ءوزى باعالاۋىڭىز ارتادى، سول ءۇشىن دە وزىڭىزگە كۇماندانبايسىز.

وزگەرىستى جاقسى كورىڭىز

ءبىزدىڭ ومىرىمىزدە كۇندە قانداي دا ءبىر وزگەرىستەر بولىپ تۇرادى. ولاردىڭ ۇساق-تۇيەك تۇرلەرىنە ءمان بەرمەۋىڭىز مۇمكىن. ال ۇلكەن وزگەرىستەر ومىرىڭىزگە ايتارلىقتاي اسەر ەتەدى. بۇل جاعدايدا سەرگەك بولىپ قالۋدىڭ جانە باتىل بولۋدىڭ جالعىز ءادىسى - وزگەرىستەرگە بەيىمدەلىپ ۇيرەنۋ.

ول ءۇشىن ومىرىڭىزگە سانالى تۇردە جاڭا نارسەلەردى ەنگىزىڭىز. سول كەزدە ءبىر جاعدايدان ەكىنشىسىنە ءوتىپ ۇيرەنە باستايسىز.

ءبىلىم الۋدى توقتاتپاڭىز

تابىسقا جەتۋدىڭ ءبىر تالابى - ۇزدىكسىز ءارى ساپالى ءبىلىم الۋ. سوندىقتان باتىل بولعىڭىز كەلسە جانە ءوز-وزىڭىزگە سەنىمدى بولا تۇسكىڭىز كەلسە، ءبىلىم الۋدى جاڭا ادەتىڭىزگە اينالدىرىڭىز.

تەك ءوز جۇمىسىڭىزدىڭ سالاسىنا قاتىستى جاڭا نارسەلەر ءبىلۋ مىندەتتە ەمەس. وزىڭىزگە بۇرىن تانىس ەمەس تاقىرىپتى زەرتتەۋ ارقىلى وي-ءورىسىڭىزدى دامىتاسىز جانە ءومىرىڭىزدى جاڭا اسەرلەرمەن تولتىراسىز.

massaget.kz