ەلىمىزدە رەسمي تىركەلگەن قانشا تاكسيست بار

استانا. قازاقپارات - قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى دانيار ءجانالىنوۆ سالىق سالاسىندا سەرۆيستىك مودەلدى دامىتۋ باعىتىنداعى جاڭا پيلوتتىق جوبالارمەن تانىستىردى، دەپ حابارلايدى قازاقپارات ءتىلشىسى.

«سالىق بويىنشا سەرۆيستىك مودەلدى دامىتۋ باعىتىندا 2 پيلوتتىق جوبا دايىندالدى. اتاپ ايتقاندا، پلاتفورمالىق جۇمىسپەن قامتۋ بويىنشا، جوبا قازىردىڭ وزىندە ىسكە اسىرىلىپ جاتىر. كەلەسى ەلەكتروندىق ساۋداعا قاتىستى، ونى بيىل 1- شىلدەدەن باستاپ ىسكە قوسۋ جوسپارلانۋدا. بۇگىندە پلاتفورمالىق جۇمىسپەن قامتۋ بويىنشا سالىق ورگاندارى، ەڭبەك جانە حالىقتى الەۋمەتتىك قورعاۋ مينيسترلىگى، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىمەن قاتار، «ياندەكس» ينتەرنەت-پلاتفورماسىمەن ينتەگراتسيالىق جۇمىستار جۇرگىزىلۋدە. ورتاق كەلىسىمگە قول قويىلدى»، - دەدى دانيار جانالىنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونىمەن قاتار كوميتەت باسشىسى كاسىپكەرلىك قىزمەتتىڭ رەسمي تۇردە تىركەلۋى كەرەكتىگىن ەسكە سالدى.

«مىسالى، تاكسي جۇرگىزۋشىسى جەكە كاسىپكەر تىركەلۋى نەمەسە تاكسوپارك شتاتىندا بولۋى كەرەك. ەگەر تولەم سومالارىن سالىستىرىپ قاراساق، ولارعا جەكە كاسىپكەر رەتىندە تىركەلگەنى تيىمدىرەك. بۇگىندە تاكسي جۇرگىزۋشىلەرىنىڭ دەنى زاڭنان تىس جۇمىس ىستەيدى. تاكسي قىزمەتى بويىنشا ەلىمىزدە 16811 جەكە كاسىپكەر تىركەلگەن. رەسمي تىركەلمەگەن تاكسيستەردىڭ الەۋمەتتىك تۇرعىدان قورعالماعانىن ۇمىتپاعان ءجون»، - دەيدى ول.

ونىڭ ايتۋىنشا، قارجىلىق ساۋاتسىزدىق جانە ازاماتتاردىڭ كاسىپكەر رەتىندە تىركەلۋدەگى قورقىنىشى سالىق مىندەتتەمەلەرىن ورىنداۋدا كەدەرگى كەلتىرەدى.