پرەزيدەنت جارلىعىمەن تۇركسوي باس حاتشىسى «دوستىق» وردەنىمەن ماراپاتتالدى
مادەنيەت جانە سپورت مينيسترلىگىنەن ءمالىم ەتكەندەي، قازاقستانعا جۇمىس ساپارىمەن وزبەكستاننىڭ مادەنيەت ءمينيسترى وزودبەك نازاربەكوۆ، سونداي-اق تۇركيا، ازەربايجان جانە قىرعىزستان مادەنيەت مينيسترلەرىنىڭ ورىنباسارلارى سەردار چام، مۋراد گۋسەينوۆ پەن قايرات يماناليەۆ كەلدى.
اباي اتىنداعى مەملەكەتتىك اكادەميالىق وپەرا جانە بالەت تەاترىندا سالتاناتتى كونسەرت ءوتتى. ءىس-شارا تۇركسوي باس حاتشىسى، قىرعىزستاننىڭ حالىق جازۋشىسى سۇلتان رايەۆتى پرەزيدەنت قاسىم-جومارت توقايەۆتىڭ جارلىعىمەن II دارەجەلى «دوستىق» وردەنىمەن ماراپاتتاۋدان باستالدى.
كونسەرتتىك باعدارلاما اياسىندا ساحنادا قازاقستان مەن تۇركسويدىڭ باسقا دا ەلدەرىنىڭ ارتيستەرى ونەر كورسەتتى.
سونداي-اق تۇركى ەلدەرىنىڭ ۇلتتىق كيىمدەرىنىڭ تاقىرىپتىق فوتوكورمەسى مەن دەفيلەسى ءوتتى. ال تەاتر اۋلاسىندا قازاقستاندىق قولونەرشىلەردىڭ كورمەسى ۇيىمداستىرىلدى.
«قازاقستان - تۇركسويدىڭ بەلسەندى قاتىسۋشىسى. ەلىمىزدىڭ باستاماسى بويىنشا 2023-جىل ۇيىم دەڭگەيىندە تەمىربەك جۇرگەنوۆ جىلى بولىپ جاريالاندى. ۇلى قايراتكەردىڭ 125 جىلدىعىنا وراي تۇركسوي ەلدەرىندە جۇزدەن استام ءتۇرلى ءىس-شارالار وتەدى. اتاپ ايتقاندا، كونسەرتتەر، عىلىمي-تاجىريبەلىك كونفەرەنتسيالار جانە كىتاپتاردىڭ تۇساۋكەسەرلەرى وسى كوكتەمدە الماتىدا باستالدى»، - دەدى ق ر مادەنيەت جانە سپورت ءمينيسترى اسحات ورالوۆ.
«قازاقستان رەسپۋبليكاسىنىڭ پرەزيدەنتىنە ماعان كورسەتكەن قۇرمەتى ءۇشىن العىس ايتامىن. قازاق جەرى تۇركى مادەنيەتى ءۇشىن كوپتەگەن ماڭىزدى تۇلعالاردىڭ وتانى بولدى. جاھاندانۋدىڭ قازىرگى داۋىرىندە تۋعان مادەنيەتتى ساقتاۋدىڭ ماڭىزدىلىعى بۇرىنعىدان دا وزەكتى. سوندىقتان تۇركسوي ەلدەرىنىڭ بارلىعى وسى ورتاق ميسسيا ءۇشىن بىرلەسىپ جۇمىس ىستەيتىن بولادى»، — دەدى سۇلتان رايەۆ.
ەسكە سالايىق، اۋقىمدى مادەني باعدارلاما 7- ماۋسىمدا باستالدى. ق ر ورتالىق مەملەكەتتىك مۋزەيىندە «مىڭجىلدىق وركەنيەت تاريحى» كورمەسى ۇيىمداستىرىلدى. كەلۋشىلەردىڭ نازارىنا ايگىلى «التىن ادام» جانە جۇزدەن استام كونە جادىگەر ۇسىنىلدى.
كەلەسى كۇنى ءا. قاستەيەۆ اتىنداعى ق ر مەملەكەتتىك ونەر مۋزەيىندە «ءبىز بىرگەمىز» اتتى كورمە اشىلدى. وندا مۋزەي قورىنان وتاندىق سۋرەتشىلەردىڭ 40 تۋىندىسى، سونداي- اق تۇركىستاننان اكەلىنگەن 30 سۋرەت ۇسىنىلدى.
ال ق ر ۇلتتىق كىتاپحاناسىندا سول كۇنى «تۇركى الەمىنىڭ بىرلىگى» اتتى كىتاپ كورمەسى باستالدى. وندا كىتاپحانا قورىنان سيرەك كەزدەسەتىن كىتاپتار مەن قولجازبالار: فيردوۋسيدىڭ «شاحنامە» جانە «ناسابنامنىڭ» ەڭبەكتەرى، قوجا احمەت ياساۋي، باقىرعاني، الىشەر ناۋاي، سوپى اللاياردىڭ ەجەلگى ەڭبەكتەرى، ابايدىڭ العاشقى باسپا كىتابى، احمەت بايتۇرسىنوۆ، ماعجان جۇمابايەۆ، جۇسىپبەك ايماۋىتوۆتىڭ ەڭبەكتەرى، سونداي-اق تۇركىلەر تاريحى بويىنشا كىتاپ ماتەريالدارى، قۇجاتتار ۇسىنىلدى تۇركسوي تۋرالى، ⅩⅩ عاسىردىڭ ءبىرىنشى جارتىسىنداعى مەرزىمدى باسىلىمدار، تۇركى حالىقتارىنىڭ مۋزىكالىق شىعارمالارى بار ۆينيلدىك گرامپلاستينكالار كوپشىلىككە ۇسىنىلدى.
تۇركسوي - تۇركى حالىقتارىنىڭ ورتاق ماتەريالدىق جانە مادەني ەسكەرتكىشتەرىن ساقتاۋ، دامىتۋ جانە بولاشاق ۇرپاققا جەتكىزۋ ماقساتىن كوزدەيتىن حالىقارالىق ۇيىم. 1993-جىلى الماتىدا قۇرىلعان. تۇركسوي قۇرامىنا 6 مەملەكەت كىرەدى: قازاقستان، تۇركيا، قىرعىزستان، ازەربايجان، تۇرىكمەنستان جانە وزبەكستان.