شەتەلدىك ساراپشىلار ەۋرازيانىڭ تۇراقتى دامۋى تۋرالى كەڭەس بەردى

استانا. قازاقپارات - تۇراقتى دامۋ ماقساتتارىنا جەتۋ حالىقتىڭ ءومىر ساپاسىن تۇسىرمەۋى كەرەك. استانا حالىقارالىق فورۋمىنىڭ ساراپشىلارى ەۋرازيانىڭ تۇراقتى دامۋى جونىندە وسىنداي كەڭەس بەردى، دەپ حابارلايدى قازاقپارات.

«بايتەرەك» حولدينگى ۇيىمداستىرعان سەسسيادا «ەۋرازيا تۇراقتى دامۋدا قاي باعىتتا كەلەدى؟» سۇراعى قويىلدى.

گونكونگ ينۆەستيتسيالىق بانكينگ دەپارتامەنتىنىڭ باسشىسى بارري چان قىتايدا تۇراقتى دامۋ ماسەلەسى قالاي قاراستىرىلاتىنىن ايتتى.

«2013-جىلى ءتوراعا شي تازا سۋ مەن جاسىل تاۋلار تۇجىرىمداماسىن جاريالادى. سوندا ق ح ر ءتوراعاسى تۇراقتىلىق - ازاماتتاردىڭ ءال-اۋقاتى ەكەنىن ايتتى. وسىلاي 2013-جىلدان بەرى قىتايدا تۇراقتىلىق تۋرالى كوبىرەك بىلدىك. شي جينپيڭ نازاربايەۆ ۋنيۆەرسيتەتىندە دە قىتاي 2030-جىلعا قاراي كومىرتەگى شىعارىندىلارىن ازايتىپ، 2060-جىلعا قاراي كومىرتەگى بەيتاراپتىعىنا جەتەتىنىمىزدى ايتتى. بۇل ءبىزدىڭ ۇلتتىق ماقساتىمىز جانە ازاماتتارىمىز وسى كوزقاراسقا جەتۋ ءۇشىن جۇمىس ىستەپ جاتقانىمىزدى بىلەدى»، - دەدى ب. چان.

ال فرانسيالىق MHB SAS ينۆەستيتسيالىق كونسالتينگىلىك كومپانياسىنىڭ پرەزيدەنتى ماري ەلەن بەرار ەۋروپادا بارلىق سالادا تۇراقتى دامۋ مىندەتى بارىن ايتتى. ءبىراق كەيدە تۇراقتىلىق جاڭا جۇمىس ورىندارى مەن تابىس اكەلەتىن جوبالاردى باستاۋعا مۇمكىندىك بەرمەيدى.

«فرانسۋز گياناسى اۋماعى امازونكا ورماندارىمەن قورشالعان، التىنعا وتە باي، ءبىراق بەلسەندى حالىقتىڭ %30 جۇمىسسىز وتىر. وندا برازيليا نەمەسە سۋرينامنان كەلگەندەر التىندى زاڭسىز، تەحنولوگياسى ناشار، قاۋىپتى تۇردە وندىرەدى. كەيبىر ءىرى كومپانيالار فرانسۋز ۇكىمەتىنە التىن وندىرۋگە جاۋاپتى قارايتىندارىن ايتتى. ءبىراق ەلدە قورشاعان ورتانى قورعاۋ يدەيالارىمەن اينالىساتىن اگرەسسيۆتى ۇ ە ۇ ءار گۇل مەن ءار كوبەلەكتى قورعاپ شىعادى. مەن ايتقان فرانسيا مىسالى ەۋروپانىڭ باسقا ەلدەرىنە دە قاتىستى. گەرمانيادا قانداي دا ءبىر شاحتانى، تاۋ قويناۋىن اشۋ مۇمكىن ەمەس. باتارەيكالار مەن تەلەفوندار ءۇشىن بىزگە پايدالى قازبالار قاجەت. بىزدە بۇل قازبالار بولسا دا، شاحتانى اشا المايمىز»، - دەدى ول.

«بايتەرەك» باسشىسى قانات شارلاپايەۆ تۇراقتى دامۋعا جەتۋ مەن ادامداردىڭ الەۋمەتتىك قاجەتتىلىكتەرىنىڭ بالانسى ساقتالۋى كەرەگىن ايتتى.

«ەۋروپاداعى ەنەرگەتيكالىق ديسبالانس پەن ينفلياتسيانىڭ ءوسۋى جاعدايىن تالداپ، «جاسىلعا» اۋىسۋ سوماسى جەتكىلىكتى باعالانبادى دەپ ۇيعاردىق. ءبىز ءوز ارەكەتىمىزدىڭ سالدارىن ءتۇسىنۋىمىز كەرەك. ەگەر حالىقتان گورى قورشاعان ورتاعا كوبىرەك كوڭىل بولسەڭىز، تابىسقا جەتۋ قيىن. ماسەلە دۇرىس تەپە- تەڭدىك جولىن تابۋدا. تۇراقتى دامۋ ماقساتتارىن قولداۋ كەرەك، ءبىراق ۇكىمەتتىڭ رەتتەۋ شارالارى ءومىر ساپاسىنىڭ تومەندەتپەۋىن ويلاعان ءجون»، - دەدى ول.