جاھاندىق ساۋدا جۇيەسىنىڭ بولشەكتەنۋ قاۋپى بار – د س ۇ باسشىسى

استانا. قازاقپارات - گەوساياسي شيەلەنىس سالدارىنان الەمدىك ەكونوميكانىڭ بولشەكتەنۋ قاۋپى بار. بۇل تۋرالى استانا حالىقارالىق فورۋمىندا دۇنيەجۇزىلىك ساۋدا ۇيىمىنىڭ باس ديرەكتورى نگوزي وكوندجو- يۆەالا ايتتى، دەپ حابارلايدى قازاقپارات ءتىلشىسى.

«ءبىز گەوساياسي شيەلەنىس سالدارىن دۇنيەجۇزىلىك ساۋدا ۇيىمى (د س ۇ) قىزمەتىندە سەزىنىپ وتىرمىز. بۇل رەتتە ماماندار بولشەكتەنۋ قاۋپى جايىندا ءجيى ايتا باستادى. جاھاندىق ساۋدا جۇيەسىنىڭ بولشەكتەنۋ قاۋپى بار. مەنىڭ ويىمشا، بۇل قازىرگى كوپجاقتى ساۋدا جۇيەسى الدىندا تۇرعان ەڭ ماڭىزدى ماسەلە»، - دەدى نگوزي وكوندجو- يۆەالا.

ونىڭ سوزىنە قاراعاندا، وسى سىن- قاتەر جاھاندىق جالپى ىشكى ءونىمنىڭ تومەندەۋىنە اكەلىپ سوعادى.

«ساۋدا سالاسىنداعى ماسەلەلەرگە وتە ساق بولعان ءجون. ويتكەنى، الەمدىك ساۋدا جۇيەسى بولشەكتەنىپ كەتسە، ونىڭ سالدارى تىم قاۋىپتى. ەگەر الەم ەكى ساۋدا بلوگىنا بولىنسە، بۇل ناقتى جاھاندىق جالپى ىشكى ءونىمنىڭ %5 كولەمىندە جوعالۋىن بىلدىرەدى دەگەن بولجام بار. اتاپ ايتقاندا، بۇل كورسەتكىش ەكونوميكالىق ىنتىماقتاستىق جانە دامۋ ۇيىمى (ە ى د ۇ) ەلدەرىنىڭ 2008- 2009 -جىلدارداعى قارجى داعدارىسى كەزىندە تاپ بولعان شىعىنىنان ارتتىق، ياعني ول كەزدەگى شىعىن %2 - %2,5 ىن قۇرادى»، - دەدى د س ۇ باسشىسى.