ادەپ جونىندەگى ۇزدىك ۋاكىلدەر انىقتالدى

استانا. قازاقپارات - مەملەكەتتىك قىزمەت ىستەرى اگەنتتىگىندە «ۇزدىك ادەپ جونىندەگى ۋاكىلدى» انىقتاۋ ماقساتىندا رەسپۋبليكالىق كونكۋرستىق كوميسسيانىڭ وتىرىسى ءوتتى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

«ۇزدىك ادەپ جونىندەگى ۋاكىل» كونكۋرسى 2018 -جىلدان بەرى وتكىزىلىپ كەلەدى. ول 2 نوميناتسيادان تۇرادى: «ورتالىق مەملەكەتتىك ورگاننىڭ ۇزدىك ادەپ جونىندەگى ۋاكىلى»، «جەرگىلىكتى اتقارۋشى ورگاننىڭ ۇزدىك ادەپ جونىندەگى ۋاكىلى» .

قاتىسۋشىلار كونكۋرستىق كوميسسيانىڭ قاراۋىنا مەملەكەتتىك قىزمەتشىلەردىڭ ءيميدجىن ارتتىرۋ جانە ادەپ جونىندەگى ۋاكىل ينستيتۋتىن ودان ءارى جەتىلدىرۋ ماسەلەلەرىنە ارنالعان ەسسە مەن جوبا پرەزەنتاتسياسىن ۇسىنۋى ءتيىس.

ءاربىر ۇمىتكەر بويىنشا شەشىم كونكۋرستىق كوميسسيا مۇشەلەرى قويعان بالداردى ەسەپتەۋ جولىمەن قابىلدانادى.

كوميسسيا قۇرامىنا پارلامەنت ءماجىلىسىنىڭ دەپۋتاتى، مەملەكەتتىك قىزمەت ىستەرى اگەنتتىگى مەن مەملەكەتتىك باسقارۋ اكادەمياسىنىڭ، بۇقارالىق اقپارات قۇرالدارىنىڭ وكىلدەرى، مەملەكەتتىك باسقارۋ سالاسىنداعى ساراپشىلار ەندى.

كوميسسيا وتىرىسىنىڭ قورىتىندىسى بويىنشا ادىلەت مينيسترلىگىنىڭ ادەپ جونىندەگى ۋاكىلى الما سىدىقوۆا «ورتالىق مەملەكەتتىك ورگاننىڭ ۇزدىك ادەپ جونىندەگى ۋاكىلى» بولىپ تانىلدى. وسى نوميناتسيادا العاشقى ءۇش ورىندى كەلەسى قاتىسۋشىلار يەلەندى:

Iورىن - يلحام امەتوۆ، ق ر اۋىل شارۋاشىلىعى مينيسترلىگى؛

Ⅱ ورىن - زينا بايگاسكينا، ق ر دەنساۋلىق ساقتاۋ مينيسترلىگى؛

Ⅲ ورىن - قابلانبەك ءاشىموۆ، قر ەكولوگيا جانە تابيعي رەسۋرستار مينيسترلىگى.

وڭىرلىك دەڭگەيدە «جەرگىلىكتى اتقارۋشى ورگاننىڭ ۇزدىك ادەپ جونىندەگى ۋاكىلى» اتاعىنا اتىراۋ وبلىسىنىڭ ادەپ جونىندەگى ۋاكىلى فاريدا احمەتوۆا يە بولدى. بۇل نوميناتسيا بويىنشا العاشقى ءۇش ورىندى كەلەسى كونكۋرسانتتار يەلەندى:

I ورىن - سەيىلحان سەرىكبايەۆ، سولتۇستىك قازاقستان وبلىسى؛

Ⅱ ورىن - ماحسات يسايەۆ، تۇركىستان وبلىسى؛

Ⅲ ورىن - رينات ارىستانبەك، شىعىس قازاقستان وبلىسى.

جەڭىمپازدار 23-ماۋسىم - مەملەكەتتىك قىزمەتشىلەر كۇنىنە ارنالعان سالتاناتتى ءىس- شارادا ماراپاتتالادى.

قازاقستاندا ادەپ جونىندەگى ۋاكىل ينستيتۋتى 2015 -جىلدان بەرى جۇمىس ىستەيدى جانە قازىرگى ۋاقىتتا ءاربىر مەملەكەتتىك ورگان مەن وبلىس اكىمدەرىنىڭ اپپاراتتارىندا 765 ادەپ جونىندەگى ۋاكىل قىزمەت اتقارادى، ولاردىڭ 30 ى دەربەس مارتەبەگە يە.

بۇگىندە ينستيتۋت قىزمەتى جوعارى تيىمدىلىگىن كورسەتۋدە. وتكەن جىلدىڭ وزىندە ادەپ جونىندەگى ۋاكىلدەر 20 مىڭنان استام ازامات پەن مەملەكەتتىك قىزمەتشىلەرگە كونسۋلتاتسيالىق كومەك كورسەتىپ، 167 ءوتىنىش بەرۋشىنىڭ قۇقىعىن قالپىنا كەلتىردى، 25 مىڭعا جۋىق ءتۇسىندىرۋ ءىس- شارالارىن جۇرگىزدى، ونىڭ ىشىندە وڭىرلەرگە 4,5 مىڭ ساپار جاسالدى.

قابىلدانعان شارالاردىڭ ناتيجەسىندە 2022 -جىلى قىزمەتتىك ادەپ نورمالارىن بۇزۋ سانى جانە تارتىپتىك جاۋاپكەرشىلىككە تارتىلعان مەملەكەتتىك قىزمەتشىلەردىڭ سانى 2021 -جىلمەن سالىستىرعاندا 412 دەن 325 كە دەيىن، ياعني %21 ازايدى.