دونالد ترامپقا جاڭا ايىپ تاعىلدى

استانا. قازاقپارات – ا ق ش- تىڭ بۇرىنعى پرەزيدەنتى دونالد ترامپ فەدەرالدى بيلىكتىڭ وزىنە قۇپيا قۇجاتتاردى دۇرىس پايدالانباعانى ءۇشىن ايىپ تاعىپ وتىرعانىن مالىمدەدى.

ول ءوزىنىڭ كىناسىزدىگىن العا تارتىپ، قازىرگى پرەزيدەنتتى ساياسي سەبەپتەرمەن قۋدالادى دەپ ايىپتايدى، دەپ حابارلايدى قازاقپارات BBC- گە سىلتەمە جاساپ.

ا ق ش اقپارات قۇرالدارىنىڭ حابارلاۋىنشا، ترامپقا جەتى باپ بويىنشا، ونىڭ ىشىندە قۇپيا قۇجاتتاردى زاڭسىز ساقتاۋ بويىنشا ايىپ تاعىلعان.

وعان سەيسەنبى كۇنى تۇستەن كەيىن ساعات ۇشتە فلوريدا شتاتىنىڭ مايامي قالاسىنداعى فەدەرالدى سوت عيماراتىنا كەلۋگە بۇيرىق بەرىلگەن.

بۇل - دونالد ترامپقا تاعىلعان ەكىنشى جانە ا ق ش- تىڭ بۇرىنعى پرەزيدەنتىنە قاتىستى فەدەرالدى پروكۋراتۋرا ۇسىنعان العاشقى ايىپتاۋ.

«امەريكا قۇراما شتاتتارىنىڭ بۇرىنعى پرەزيدەنتىنە وسىنداي ارەكەتتەر جاسالادى دەپ ەشقاشان ويلاماپپىن»، - دەدى ترامپ.

«ءبىز ۇلكەن قۇلدىراۋ الدىندا تۇرعان ەلمىز. ءبىراق، ءبىز بىرىگىپ امەريكانى قايتادان ۇلى ەل ەتەمىز!» - دەپ جازدى ول ءوزىنىڭ سوڭعى سايلاۋ ناۋقانىنىڭ باستى ۇرانىن ءسوز ەتىپ.

دونالد ترامپ 2024 -جىلى پرەزيدەنتتىككە قايتا ورالۋ ناۋقانىن جۇرگىزىپ جاتىر. ەگەر كىنالى دەپ تانىلسا، بۇرىنعى پرەزيدەنت تۇرمەگە قامالۋى مۇمكىن.

سونىمەن قاتار، زاڭگەر ساراپشىلار ا ق ش زاڭىندا نەمەسە كونستيتۋتسياسىندا ونىڭ سايلاۋ الدىنداعى ناۋقانعا قاتىسۋ مۇمكىندىگىن شەكتەيتىن ەشقانداي باپ جوق ەكەنىن ايتادى.

بۇرىنعى پرەزيدەنتتىڭ زاڭگەرى دجيم تراستي CNN- گە بەرگەن سۇحباتىندا ترامپقا تاعىلعان ايىپتاردى ەگجەي- تەگجەيلى باياندادى.

ونىڭ ايتۋىنشا، ايىپتاۋ تىزىمىندە قاستاندىق، جالعان ايعاقتار، سوت تورەلىگىنە كەدەرگى جاساۋ جانە تىڭشىلىق تۋرالى زاڭعا سايكەس قۇپيا قۇجاتتاردى زاڭسىز ساقتاۋ بار.

ترامپ وزىنە تاعىلعان ايىپپەن ءۇزىلدى- كەسىلدى كەلىسپەيدى.

Truth Social-داعى حابارلاماسىندا ول دجو بايدەندى تاعى دا قاتتى سىنعا الىپ، قۇپيا قۇجاتتار قازىرگى امەريكا پرەزيدەنتىمەن بايلانىستى بىرنەشە مەكەنجايدان تابىلعانىن ەسكە سالدى.