ەلىمىزدە باسپانا ماسەلەسى جاساندى ينتەللەكت ارقىلى شەشىلۋى مۇمكىن

استانا. قازاقپارات - قازاقستاندا حالىققا ارنالعان الەۋمەتتىك كومەكتى جاساندى ينتەللەكت ارقىلى جۇزەگە اسىرۋ ادىستەرى قارالىپ جاتىر.

بۇل تۋرالى استانا حالىقارالىق فورۋمىندا سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى قازاقپارات ءتىلشىسى.

مينيستر جاساندى ينتەللەكتتى دامىتۋ ءۇشىن ساپالى دەڭگەيدە جيناقتالعان مالىمەتتەردىڭ قۇرىلىمدىق دەرەكتەر قورىن قالىپتاستىرۋ قاجەت ەكەنىن اتاپ ءوتتى.

«قازىر بىزدە 400 ءتۇرلى دەرەكتەر بازاسى بار جانە ولاردى بىرىكتىرۋگە تىرىسىپ جاتىرمىز. بۇل رەتتە بىرىكتىرىلىپ جاتقان 80 نەگىزگى دەرەكتەر بازاسى بار. ەندى ءبىز ولاردى تالداپ، ناتيجەسىن شىعارامىز. ماسەلەن، قازاقستاندا 600 مىڭ ادام ءتيىمدى باعادا باسپانا الۋعا ءوتىنىش جاساسا، ولاردىڭ كەيبىرى وسىدان 10 نەمەسە 5 جىل بۇرىن قۇجاتتارىن وتكىزگەن. ءبىراق ءبىز قازىر مالىمەتتەر بازاسىن ءبىر دەرەكتەر قورىنا بىرىكتىردىك جانە وسى 600 مىڭ ءوتىنىشتى زەردەلەدىك. وسى ورايدا ولاردىڭ جارتى ميلليونىندا پاتەرلەر بار ەكەنى انىقتالدى. ولار ەندى ۇكىمەتتەن بۇل قولداۋ ءتۇرىن المايدى. دەگەنمەن، ءتيىستى قولداۋ باسپاناعا مۇقتاج باسقا وتباسىلارعا باعىتتالادى»، - دەدى ب. مۋسين.

باعدات مۋسين قازاقستان مەملەكەتتىك قىزمەت كورسەتۋدىڭ پرواكتيۆتى ادىسىنە كوشۋگە نازار اۋدارىپ وتىرعانىن ايتتى. بۇل ءوز كەزەگىندە قازاقستان حالقىنا قانداي قولداۋ قاجەت ەكەنىن تۇسىنۋگە مۇمكىندىك بەرەدى.

«وسىعان دەيىن الەۋمەتتىك كومەك الۋعا جۇگىنبەگەن ازاماتتارعا 60 000 SMS جىبەرىپ، حابارلاماداعى سىلتەمەنى باسۋ ارقىلى وسى كومەكتى الۋعا جاعداي جاسالاتىنىن ەسكەرتتىك. وسى ورايدا مۇنداي تاسىلدەر جاساندى ينتەللەكتتىڭ باستاپقى مۇمكىندىكتەرىنىڭ ءبىرى سانالادى. الداعى ۋاقىتتا بۇل تەحنولوگيالار ارقىلى تالداۋ جاساۋعا كوشەمىز»، - دەدى مينيستر.

بۇدان بۇرىن حابارلانعانداي، ەلىمىزدە جىل سوڭىنا دەيىن جاساندى ينتەللەكتى دامىتۋ ستراتەگياسىن جاريالاۋ جوسپارلانىپ وتىر.