تەك ءىرى دەرجاۆالاردىڭ توڭىرەگىندە قالىپتاسقان حالىقارالىق جۇيەدەن ارىلۋ كەرەك - ماۋلەن اشىمبايەۆ
سەنات ءتوراعاسى فورۋمدا الەمدىك ءتارتىپتىڭ پاراديگماسى وزگەرگەن كەزەڭدەگى «ورتا» مەملەكەتتەردىڭ ءرولى جونىندە بايانداما جاسادى.
پالاتا سپيكەرى ءوز سوزىندە فورۋم نەگىزگى جاھاندىق پروبلەمالاردى بىرلەسىپ شەشۋ ءۇشىن حالىقارالىق قوعامداستىقتى ورتاق ماقساتقا جۇمىلدىرۋدى كوزدەيتىنىن اتاپ ءوتتى. سونداي- اق ول ديپلوماتيا مەن حالىقارالىق قۇقىق جۇيەلەرىنىڭ السىرەۋىنە بايلانىستى الەمدىك ديالوگتىڭ جاڭا فورماتىنىڭ وزەكتىلىگى ارتىپ وتىرعانىن ايتتى.
«بۇل جاعدايدا ورتا مەملەكەتتەردىڭ ءرولىن قايتا قاراستىرۋ كەرەك. تەڭدىك، ديالوگ، ينكليۋزيا، مەملەكەتتەردىڭ اۋماقتىق تۇتاستىعىن قۇرمەتتەۋ قاعيداتتارىنا باعىتتالعان حالىقارالىق ىنتىماقتاستىقتىڭ جاڭا پاراديگماسى قاجەت. مۇنداي جاڭا جاعدايدا ورتا ەلدەر نەگىزگى رولدەردىڭ ءبىرىن اتقارۋعا ءتيىس. تەك ءىرى دەرجاۆالاردىڭ قارىم- قاتىناسى توڭىرەگىندە قالىپتاسقان حالىقارالىق جۇيەدەن ارىلۋدىڭ ماڭىزى زور. قازىرگى تاڭدا جەلىلىك پرينتسيپ بويىنشا قۇرىلعان ينستيتۋتتار ءتيىمدى. وسى تاجىريبەنى حالىقارالىق ينستيتۋتتارعا دا ەنگىزۋگە بولادى»، - دەدى م. اشىمبايەۆ.
سونىمەن قاتار سەنات ءتوراعاسى حالىقارالىق دەڭگەيدە ديالوگ مادەنيەتىن دارىپتەۋدىڭ پەرسپەكتيۆالىق باعىتتارىنا نازار اۋداردى. سول ارقىلى بەلسەندى ورتا مەملەكەتتەر ءۇشىن ءوز مۇمكىندىكتەرىن ىسكە اسىرۋىنا جول اشىلادى.
«بىرىنشىدەن، بىتىمگەرشىلىك باستامالاردى دارىپتەۋ جانە مۇقتاج ەلدەرگە نەمەسە بەلگىلى ءبىر الەۋمەتتىك توپتارعا گۋمانيتارلىق كومەك كورسەتۋ. ەكىنشىدەن، نەگىزگى حالىقارالىق ينستيتۋتتاردان تىس جاعدايدا ىنتىماقتاستىق پەن ءوزارا ءىس- قيمىلدى نىعايتۋ. ۇشىنشىدەن، بۇگىندە بارلىق ەل بەتپە- بەت كەلىپ وتىرعان وزەكتى ەكولوگيالىق، الەۋمەتتىك، گۋمانيتارلىق جانە وزگە دە پروبلەمالاردى تالقىلاۋعا باستاماشىلىق جاساۋ. سونىمەن بىرگە، رەسۋرستاردى عىلىمي زەرتتەۋلەرگە، ادامزاتتىڭ بولاشاعى ءۇشىن ماڭىزدى سالالارداعى جوبالارعا باعىتتاۋدىڭ ءمانى زور. ونىڭ ىشىندە مەديتسينا، بيوحيميا، جاسىل تەحنولوگيا جانە تاعى باسقا باعىتتاردى اتاپ وتۋگە بولادى»، - دەگەن ماۋلەن اشىمبايەۆ استانا حالىقارالىق فورۋمىنىڭ قىزمەتىن مىسالعا كەلتىردى.
سەنات سپيكەرى جاھاندىق دەڭگەيدە مادەنيەتتەر مەن وركەنيەتتەر اراسىندا التىن كوپىر بولاتىن تاعى ءبىر ءتيىمدى باستاما رەتىندە الەمدىك جانە ءداستۇرلى دىندەر ليدەرلەرىنىڭ سەزىن ايتتى.
«بۇگىندە قازاقستان رۋحاني ديپلوماتيانىڭ مويىندالعان حالىقارالىق ورتالىقتارىنىڭ ءبىرى رەتىندە قالىپتاستى. پرەزيدەنتىمىز قاسىم- جومارت كەمەل ۇلى توقايەۆتىڭ باستاماسىمەن ءدىن ليدەرلەرىنىڭ يدەيالارىن، ۇسىنىستارى مەن ۋاعدالاستىقتارىن دارىپتەۋ ءۇشىن الەمنىڭ رۋحاني ورتالىقتارىندا دوڭگەلەك ۇستەلدەر وتكىزۋ قولعا الىندى. قازاقستاننىڭ باستامالارى الەمدەگى ماڭىزدى پروبلەمالاردى شەشۋ كەزىندەگى ورتا ەلدەردىڭ مۇمكىندىكتەرىن كورسەتەدى. مۇنداي قادام دامىعان، تۇراقتى، ينكليۋزيۆتى جانە ءقاۋىپسىز الەم قۇرۋىمىزعا ىقپال ەتەتىنى انىق»، - دەدى ماۋلەن اشىمبايەۆ.
وسى ورايدا ول قازاقستان حالىقارالىق قاقتىعىستاردى ديپلوماتيالىق جولمەن رەتتەۋدى قولدايتىنىن تىلگە تيەك ەتتى.