تۇرعىندار سانى ازايعان اۋىلدارعا اكىمدىكتەر قولداۋ كورسەتۋى كەرەك - مينيستر

استانا. قازاقپارات - ۇلتتىق ەكونوميكا ءمينيسترى الىبەك قۋانتىروۆ پەرسپەكتيۆاسى تومەن اۋىلداردىڭ تۇرعىندارىن دامۋ مۇمكىندىگى جوعارى ەلدى مەكەندەرگە كوشىرۋ مۇمكىندىگىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ايماقتىق ستاندارتتار جۇيەسى بار. وندا ساپا ماسەلەسى ەسكەرىلگەن. ءبىز پەرسپەكتيۆاسى بار اۋىلداردىڭ دەڭگەيىن كوتەرۋىمىز كەرەك. بۇل تۇرعىدا ينفراقۇرىلىم، جولدار جانە باسقا دا ماسەلەلەر قامتىلىپ وتىر. اتاپ ايتقاندا، وسى باعىتتا تىرەك ءارى سپۋتنيك اۋىلدار قاراستىرىلعان، ياعني ولاردىڭ سانى 3,5 مىڭعا جەتتى»، - دەدى الىبەك قۋانتىروۆ استانا حالىقارالىق فورۋمى اياسىندا وتكەن بريفينگىدە.

ونىڭ ايتۋىنشا، شاعىن اۋىلدارعا قولداۋ كورسەتۋ ماسەلەسىنە اكىمدىكتەر ەرەكشە ءمان بەرۋى كەرەك.

«كەيبىر ەلدى مەكەننەن تۇرعىندار قونىس اۋدارىپ جاتقانىن بايقالىپ وتىر، ياعني كوبىنە جاستاردىڭ كەتىپ جاتقانى بەلگىلى. جاقىن ورنالاسقان كەيبىر ەلدى مەكەندەر اۋىلدىق وكرۋگتەرگە بىرىكتىرىلىپ جاتىر. ءبىز ءىرى اۋىلداردى ءتيىستى ستاندارتتارعا جەتكىزەمىز، سونداي- اق شاعىن اۋىلدارعا دا نازار اۋدارامىز. اكىمدىكتەر تۇرعىندارى ازايعان اۋىلدارعا قولداۋ كورسەتۋى كەرەك»، - دەدى مينيستر.

سونىمەن قاتار ول شەكارا ماڭىنداعى اۋىلدارعا ەرەكشە نازار اۋدارۋ كەرەك ەكەنىن ايتتى.

«بۇل ەلدى مەكەندەردى بارىنشا ادامي كاپيتالمەن تولىقتىرۋ ماڭىزدى، جۇمىس ورىندارىن قۇرۋ قاجەت. بۇل كۇردەلى ماسەلە»، - دەدى ۇلتتىق ەكونوميكا ءمينيسترى.

اۆتور:

رۋسلان عابباسوۆ