الەم ەلدەرى پاريجدە پلاستيك ماسەلەسى بويىنشا كەزدەستى
جاڭا كەلىسىم- شارت ماسەلەنى شەشە الا ما؟ پاريجدەگى كەزدەسۋ جەر شارىمىزدا پلاستيك قالدىعىن ازايتۋدى كوزدەگەن الەم ەلدەرىنىڭ ەكىنشى باسقوسۋى بولدى. شاراعا قاتىسۋشىلار 2040 -جىلعا دەيىن دۇنيە ءجۇزىن پلاستيك قالدىقپەن لاستاۋدى 80 پايىزعا دەيىن ازايتۋعا نيەتتى. ب ۇ ۇ كەلەشەك شارتتى پاريج كەلىسىمىنەن كەيىنگى ەڭ ماڭىزدى قۇجات دەپ وتىر.
دجيوتي ماتۋر- فيليپپ، ۇكىمەتارالىق كەلىسسوز كوميتەتىنىڭ اتقارۋشى حاتشىسى:
- ۋاقىت از. ءبىز پلاستيكتەردىڭ قورشاعان ورتانى لاستاۋىن توقتاتۋ ءۇشىن تەز قيمىلداۋىمىز قاجەت. ايتپەسە تىم كەش بولادى. بۇل ىستە ىنتىماقتاسىپ ارەكەت ەتۋ وتە ماڭىزدى. ال الەمدە ءار سەكۋند سايىن قورشاعان ورتاعا 1 جۇك كولىگىندەي پلاستيك قوقىس تاستالادى ەكەن. ەگەر لاستاۋ وسى قارقىنمەن جالعاسسا 2050 -جىلعا تامان قالدىقتان اۋاعا پارنيكتىك گازدىڭ تاراۋى 6,5 گيگاتونعا جەتەدى. سول سەبەپتى ساراپشىلار پلاستيك قۇتىنى وڭدەۋ، قايتا پايدالانۋ جانە ەكولوگيالىق ماتەريالدارمەن الماستىرۋ ارقىلى كۇرەسۋدى ۇسىنىپ وتىر.
ينگەر اندەرسەن، ب ۇ ۇ قورشاعان ورتانى قورعاۋ باعدارلاماسىنىڭ اتقارۋشى ديرەكتورى:
- ءبىز پلاستيك ونىمدەردى ءوندىرۋ، پايدالانۋ جانە قوقىسقا تاستاۋعا دەيىنگى بارلىق كەزەڭدى رەتتەيتىن اۋقىمدى قۇجاتتى قابىلداۋعا شاقىرامىز. بۇل مۇحيتتار مەن تەڭىزدەردىڭ لاستانۋىن الدىن الۋعا مۇمكىندىك بەرەدى. كەي مەملەكەتتەر وڭدەۋگە كەلمەيتىن پلاستيك تۇرلەرىن شىعارۋعا تىيىم سالۋدى قالايدى.
ءبىراق مۇناي- حيميا سالاسى كەڭىنەن دامىعان ا ق ش، ساۋد ارابياسى سياقتى ەلدەر ولاردى قايتا وڭدەۋگە باسىمدىق بەرىلۋ كەرەك دەيدى. قۇجاتتى تالقىلاۋ الداعى ۋاقىتتا جالعاسادى. كەلەر باسقوسۋ قاراشا ايىندا كەنيا استاناسى نايروبيدە وتەدى. وندا تاراپتار ءار ەلدىڭ پلاستيكتەن جاسالاتىن ونىمدەرگە قاتىستى ۇستانىمىن قاراستىرۋدى جوسپارلاپ وتىر.
www.24.kz