ەلىمىزدە كيبەر پوليتسيا قىزمەتى ىسكە قوسىلادى - مارات احمەتجانوۆ

تۇركىستان. قازاقپارات - ەلىمىزدە كيبەر پوليتسيا قىزمەتى ىسكە قوسىلادى. بۇل تۋرالى ىشكى ىستەر ءمينيسترى مارات احمەتجانوۆ تۇركىستاندىقتارمەن كەزدەسۋىندە ايتتى، دەپ حابارلايدى قازاقپارات ءتىلشىسى.

جاڭا قىزمەت يەلەرى IT تەحنولوگيالاردى مەڭگەرگەن كاسىبي مامانداردان جاساقتالادى. ينتەرنەت الاياقتارعا تاپ بولعان جابىرلەنۋشىلەردى تىركەپ، اقشاسىن ساقتاپ قالۋعا ارنالعان شارالاردى سول جەردە قابىلدايدى. بانكتىك ەسەپشوتىن بۇعاتتاۋعا كومەك بەرەدى.

«ەۋروپا كەڭەسىنىڭ كومپيۋتەرلىك قىلمىستار تۋرالى كونۆەنتسياسىنا ۇسىنىس بەردىك. ءبىزدى كۇزگە جاقىن قابىلدايىن دەپ جاتىر. وندا مۇشە 66 ەل بار. سونىڭ بارشاسى دا بىزگە قۇقىقتىق كومەك بەرەدى. بىرلەسىپ تەرگەۋ امالدارىن جۇرگىزىپ، الاياقتىقتىڭ جولىن كەسەمىز»، - دەدى مارات احمەتجانوۆ.

كەزدەسۋدە مينيستر ەلىمىزدەگى ينتەرنەت الاياقتىقتىڭ 5 ەسە وسكەنىن ايتىپ ءوتتى. 2018-جىلى 4000 بولسا، 2022-جىلى 20000 عا كوبەيگەن. ال وسى جىلدىڭ باسىنان بەرى بۇل باعىتتا 8000 قىلمىس تىركەلگەن. تۇركىستان وبلىسىندا 5 اي ىشىندە 149 ينتەرنەت الاياقتىق قىلمىسى بولعانى انىقتالدى.

«تەحنولوگيالار مەن ونلاين قىزمەتتەردىڭ دامۋىنا بايلانىستى الاياقتار مۇمكىندىكتەردى پايدالانىپ، حالىقتىڭ اتىنان نەسيە الىپ جاتىر. حالىقتىڭ جيناعان قاراجاتىن جاراتۋدا. قازىر الاياقتار شەتەلدىك نومىرمەن تەلەفون سوعادى. بۇرىن قازاقستاندىق نومىرمەن بايلانىساتىن ەدى. ءبىز زەرتتەدىك. وپەراتورلارمەن مەموراندۋم جاساپ، جالعان نومەرلەردى بۇعاتتادىق. وسىلايشا 5 ايدىڭ ىشىندە 18 جارىم ميلليون قازاقستان ازاماتىن جالعان تەلەفون قوڭىراۋىنان ساقتاپ قالدىق»، - دەدى مينيستر.

سونداي-اق مارات احمەتجانوۆ ۋكراينادا وتىرىپ قازاقستاندىقتاردىڭ ەسەپشوتتورىنداعى قارجىسىن جىمقىرىپ كەلگەن قىلمىسكەرلەردىڭ جولى كەسىلگەنىن مالىمدەدى.

«10 ميللياردتان استام قاراجاتىمىز شەتەلگە كەتىپ قالعان. سونىڭ سوڭىنان باردىق. الاياقتار ۋكراينادا ۇلكەن كول ورتالىق اشىپ العان ەكەن. ءۇش اۋىسسىممەن جۇمىس ىستەپ، قازاقستاننىڭ ازاماتتارىن الداپ، اقشالارىن الىپ وتىرعان. زەينەتكەرلەردىڭ، مۇعالىمدەردىڭ، دارىگەرلەردىڭ قاراجاتىن جىمقىرىپ كەلگەن. سونىڭ جولىن كەستىك»، - دەدى مينيستر.