قازاقستان نارىعىندا شۆەيتساريادان نەشە ينۆەستور جۇمىس ىستەپ جاتىر
«ەكونوميكا سالاسىندا ءبىزدىڭ قارىم-قاتىناسىمىز وتە جاقسى. قازاقستان - شۆەيتساريانىڭ ورتالىق ازياداعى ەڭ ماڭىزدى ەكونوميكالىق سەرىكتەسى، ال شۆەيتساريا ءۇشىنشى ءىرى ينۆەستور سانالادى. ۇلتتىق بانكتىڭ مالىمەتىنە قاراعاندا، قازاقستان نارىعىندا شۆەيتساريادان 40 ينۆەستور بەلسەندى جۇمىس ىستەپ جاتىر»، - دەدى يۆو گەرمان استانا حالىقارالىق فورۋمىندا.
سونىمەن قاتار ول قازاقستانداعى رەفورماعا قاتىستى پىكىر ءبىلدىردى.
«ەگەر ءبىز كەدەرگىلەردى ەڭسەرە الساق، وندا ەكونوميكالىق قاتىناستارداعى الەۋەتىمىزدى نىعايتا تۇسەمىز. قازاقستان ۇكىمەتى 2022-جىلى باستاعان رەفورمالار باعدارلاماسى بۇل باعىتتا جاقسى ناتيجەگە الىپ كەلەدى دەپ سانايمىز. ونداعى نەگىزگى ەلەمەنتتەر ءقازىردىڭ وزىندە ءوسىمدى بايقاتىپ وتىر. بۇل تۇرعىدا شۆەيتساريا بيزنەسى مەن باسقا دا كاسىپكەرلەر ءۇشىن ەكونوميكانى ءارتاراپتاندىرۋ، شاعىن جانە ورتا بيزنەستى دامىتۋ، سيفرلاندىرۋ، زاڭ ۇستەمدىگىن نىعايتۋ، سونداي-اق ادامي كاپيتالدى دامىتۋ نەگىزگى ەلەمەنت سانالادى. بۇعان شۆەيتساريالىق كومپانيالار نازار اۋدارىپ وتىر. سوندىقتان ىسكە قوسىلىپ جاتقان جاڭا قادامدار قازاقستانداعى نارىقتى تارتىمدى ەتە تۇسەدى»، - دەدى يۆو گەرمان.
بۇدان بۇرىن حابارلانعانداي، بۇگىن ەلورداداعى كونگرەسس ورتالىقتا استانا حالىقارالىق فورۋمى جۇمىسىن باستادى.
فورۋم كليماتتىڭ وزگەرۋىنە، ازىق-تۇلىك تاپشىلىعىنا جانە ەنەرگەتيكالىق قاۋىپسىزدىككە قاتىستى ماسەلەلەردى شەشۋ جولدارىن قاراستىرۋ ماقساتىندا شەتەل ۇكىمەتتەرىنىڭ، حالىقارالىق ۇيىمداردىڭ، بيزنەس پەن عىلىمي ورتانىڭ جوعارى لاۋازىمدى دەلەگاتتارىنىڭ ديالوگىنە ارنالعان الاڭ بولماق.