پرەزيدەنت شەتەلدىك ينۆەستورلار كەڭەسىنىڭ وتىرىسىندا قانداي ماسەلەلەر كوتەردى
قازاقپارات بۇل تۋرالى اقورداعا سىلتەمە جاساپ حابارلايدى.
مەملەكەت باسشىسى قاسىم-جومارت توقايەۆ شەتەلدىك ينۆەستورلار كەڭەسىنىڭ 35-پلەنارلىق وتىرىسىنا قاتىسۋشىلارعا ءىلتيپات بىلدىرە وتىرىپ، بۇگىنگى جيىن استانا حالىقارالىق فورۋمىمەن تۇسپا-تۇس كەلىپ وتىرعانىن ءارى بيىل شەتەلدىك ينۆەستورلار كەڭەسىنىڭ قۇرىلعانىنا 25 جىل تولعانىن اتاپ ءوتتى.
كۇن تارتىبىندە تالقىلانعان ماسەلە - ەكونوميكانىڭ تسيفرلىق ترانفورماتسياسى. پرەزيدەنت گەوساياسي شيەلەنىس پەن پروتەكتسيونيزمنىڭ قارقىن الۋى الەمدىك ەكونوميكانى وزگەرىسكە ۇشىراتىپ جاتقانىن اتاپ ءوتىپ، كەز كەلگەن داعدارىس جاڭا مۇمكىندىكتەرگە جول اشاتىنىنا نازار اۋداردى.
وراسان زور تەحنولوگيالىق سەرپىن بەرەتىن «سيفرلاندىرۋ» وسىنداي مۇمكىندىكتىڭ ءبىرى دەپ سانايمىز. سيفرلاندىرۋ قارقىنى ەكونوميكانىڭ دامۋىنا زور ىقپال ەتىپ، بۇگىنگى كۇن ءتارتىبىنىڭ باعىت-باعدارىن ايقىنداپ بەردى. جاساندى ينتەللەكت، بلوكچەين، ينتەرنەت زاتتار (IoT) جانە ۇلكەن دەرەكتەر (Big Data) سەكىلدى جاڭا تۇجىرىمدار مەن تەحنولوگيالاردى كەڭ كولەمدە ەنگىزۋ اۋىل شارۋاشىلىعىنان باستاپ قارجى سالاسىنا دەيىن بارلىق سالاداعى ويىن ەرەجەسىنىڭ وزگەرۋىنە الىپ كەلەدى. سيفرلاندىرۋ تۇتاس ەلدەر مەن وڭىرلەردىڭ باسەكەگە قابىلەتتىلىگىن انىقتاۋشى فاكتورعا اينالدى. 2025-جىلعا قاراي الەمدەگى تسيفرلىق نارىق 50 پايىزعا ارتىپ، 6,8 تريلليون دوللارعا جەتەدى دەپ بولجانىپ وتىر. بولجام بويىنشا 10 جىلدا الەمدەگى تاۋار ءوندىرىسى مەن كورسەتىلەتىن قىزمەتتەردىڭ 70 پايىزىندا سيفرلىق تەحنولوگيالار قولدانىلادى. بۇل ءۇردىستىڭ قازاقستان ءۇشىن اسا ماڭىزدى ەكەنىن انىق تۇسىنەمىز. تاياۋدا الەمدەگى 62 ەل ورتالىق ازيانىڭ ورنىقتى دامۋى ءۇشىن قازاقستاندا بىرىككەن ۇلتتار ۇيىمىنىڭ سيفرلىق شەشىمدەر ورتالىعىن قۇرۋ تۋرالى باستاماسىن ءبىراۋىزدان قولدادى. مۇنى بىزگە ارتىلعان زور سەنىم جانە قازاقستاننىڭ الەمدىك ارەناعا شىعۋداعى ماڭىزدى كەزەڭى رەتىندە قابىلدايمىز، - دەدى مەملەكەت باسشىسى.
پرەزيدەنت، سيفرلىق ينتەللەكت يندەكسىنە (Digital IQ) سايكەس، قازاقستان سيفرلاندىرۋ قارقىنى بويىنشا 20-ورىندا ەكەنىن جانە سيفرلىق ورتانى دامىتۋ تۇرعىسىنان پەرسپەكتيۆتى ەلدەردىڭ قاتارىنا كىرەتىنىن ايتتى.
2022-جىلى ەلىمىزدەگى سيفرلاندىرۋ سالاسى 12 پايىزعا ءوستى. وتاندىق سيفرلىق ونىمدەردىڭ حالىقارالىق نارىقتاعى باسەكەگە قابىلەتتىلىگى ارتىپ كەلەدى. بىلتىر IT ونىمدەرى مەن قىزمەتتەر ەكسپورتى 5 ەسە ۇلعايىپ، 333 ميلليون دوللاردى قۇرادى. ماقساتىمىز - 2025-جىلعا قاراي بۇل كورسەتكىشتى 500 ميلليون دوللارعا دەيىن جەتكىزۋ. دەگەنمەن ءبىز ودان ءارى ىلگەرىلەي بەرۋگە نيەتتىمىز، - دەدى قاسىم-جومارت توقايەۆ.
سونىمەن قاتار شەتەلدىك ينۆەستورلار كەڭەسىنىڭ وتىرىسىندا ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو، پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ، سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين، «قازاقستاننىڭ شەتەلدىك ينۆەستورلار كەڭەسى» قاۋىمداستىعىنىڭ باسقارما ءتوراعاسى ەرلان دوسىمبەكوۆ، ازيا دامۋ بانكىنىڭ پرەزيدەنتى ماساتسۋگۋ اساكاۆا، CNPC كومپانياسىنىڭ پرەزيدەنتى حوۋ تسزيتسزيۋن، Shell plc كومپانياسىنىڭ باس اتقارۋشى ديرەكتورى ۋاەل ساۋان، Chevron كورپوراتسياسىنىڭ اتقارۋشى ۆيتسە-پرەزيدەنتى نايدجەل حيرن، Philip Morris International كومپانياسىنىڭ ت م د جانە ورتالىق ازيا بويىنشا پرەزيدەنتى ماركو ماريوتتي، «لۋكويل» كومپانياسىنىڭ باس اتقارۋشى ديرەكتورى ۆاديم ۆوروبيەۆ، Ernst&Young كومپانياسىنىڭ ەۋروپا، تاياۋ شىعىس جانە افريكا ايماقتارى بويىنشا باسقارۋشى سەرىكتەسى دجۋلي لينن تيگلاند، Air Liquide كومپانياسىنىڭ باس اتقارۋشى ديرەكتورى فرانسۋا جاكوۆ، Baker Hughes كومپانياسىنىڭ ءتوراعاسى جانە باس اتقارۋشى ديرەكتورى لورەنتسو سيمونەللي، Microsoft كورپوراتسياسىنىڭ ورتالىق جانە شىعىس ەۋروپا بولىمشەسىنىڭ باس ديرەكتورى ميشەل سيممونس، Wabtec كورپوراتسياسىنىڭ پرەزيدەنتى جانە باس اتقارۋشى ديرەكتورى رافاەل سانتانا ءسوز سويلەدى.
