شيگەو كاتسۋ نازاربايەۆ ۋنيۆەرسيتەتىنىڭ باسشىلىعىنان نەلىكتەن كەتىپ جاتقانىن ايتتى

استانا. قازاقپارات - نازاربايەۆ ۋنيۆەرسيتەتىنىڭ پرەزيدەنتى لاۋازىمىنان كەتىپ جاتقان شيگەو كاتسۋ ءوز شەشىمىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

بۇگىن استانا حالىقارالىق فورۋمىندا شيگەو كاتسۋ تىلشىلەر سۇراعىنا جاۋاپ بەردى. وسى ورايدا ول نازاربايەۆ ۋنيۆەرسيتەتىنىڭ قامقورشىلىق كەڭەسىنىڭ مۇشەسى رەتىندە قالاتىنىن ايتتى.

«مەن وسىندا قالامىن. اتاپ ايتقاندا، وقۋ ورنىنداعى وزگە دە كەڭەستەردە قىزمەتىمدى جالعاستىرامىن»، - دەدى كاتسۋ.

ج و و باسشىسى سونىمەن قاتار لاۋازىمىنان نە سەبەپتى كەتىپ جاتقانىن ءتۇسىندىردى.

«13 جىلعا جۋىق وسى لاۋازىمدا قىزمەت اتقاردىم. وسىعان دەيىن جۇزەگە اسىرماي، كەيىنگە قالدىرعان ءبىراز جۇمىسىم بار ەدى، بۇل جوسپارىمدى ىسكە اسىرۋعا كىرىسەمىن»، - دەدى شيگەو كاتسۋ.

نازاربايەۆ ۋنيۆەرسيتەتىنىڭ رەسمي سايتىندا 2023 -جىلدىڭ 15-ماۋسىمىنان پرەزيدەنت شيگەو كاتسۋ وتستاۆكاعا كەتەتىنى جاريالانعان بولاتىن.

«پرەزيدەنتتىك قىزمەتىنەن كەتكەننەن كەيىن شيگەو كاتسۋ نازاربايەۆ ۋنيۆەرسيتەتىنىڭ قامقورشىلىق كەڭەسىنىڭ مۇشەسى، سونداي- اق نازاربايەۆ زياتكەرلىك مەكتەپتەرى، نازاربايەۆ قورىنىڭ قامقورشىلىق كەڭەسىنىڭ مۇشەسى جانە جوعارى قامقورشىلىق كەڭەسىنىڭ مۇشەسى رەتىندە قىزمەتىن جالعاستىرادى»، - دەلىنگەن مالىمەتتە.

عىلىم جانە جوعارى ءبىلىم ءمينيسترى ساياسات نۇربەك استانا حالىقارالىق فورۋمىنىڭ كۋلۋارىندا نازاربايەۆ ۋنيۆەرسيتەتىن قانداي وزگەرىستەر كۇتىپ تۇرعانىن ايتتى.