قازاقستان ورتالىق ازياداعى الەۋمەتتىك- ەكونوميكالىق تەپە- تەڭدىكتى ساقتاۋعا ۇلەس قوسىپ وتىر - تيبەريو گراتسياني
سۇحبات بارىسىندا تيبەريو گراتسياني قازاقستاننىڭ وتە جاس رەسپۋبليكا ەكەنىن اتاپ ءوتتى.
دەگەنمەن ونىڭ مالىمدەۋىنشە، 30 جىلدىڭ ىشىندە ەلىمىز وزگەرىپ، جاڭا قازاقستان پايدا بولدى. سونىمەن قاتار اتالعان ۋاقىت ىشىندە ەلىمىزدە ەكونوميكالىق ەۆوليۋتسيا بولدى.
سونداي- اق، شەتەلدىك مەيمان ەلىمىزدە جاستاردىڭ سانى ارتقانىن ايتا كەلە، وسكەلەڭ ۇرپاق جاس رەسپۋبليكامىزدىڭ بولاشاعى ەكەندىگىنە سەنىم ءبىلدىردى.
سپيكەر قازاقستانداعى ساياسي رەفورمالارعا قاتىستى پرەزيدەنتتىڭ، ۇكىمەتتىڭ جاڭارىپ، كونستيتۋتسياعا وزگەرىستەر ەنگىزىلگەنىن اتاپ ءوتتى.
ودان بولەك، مامان ەكونوميكا مەن بيزنەستى ىلگەرىلەتۋ باعىتىندا كونستيتۋتسياعا جاڭا باپتاردىڭ قوسىلۋى وتە ماڭىزدى ەكەندىگىنە توقتالدى.
تيبەريو گراتسياني قازاقستاننىڭ ورتالىق ازياداعى نەگىزگى قوزعاۋشى كۇش ەكەنىن ايتادى.
«مەنىڭ ويىمشا، قازاقستان باسشىلىعى ءوڭىردىڭ باسقا ەلدەرىن قولداۋعا جاۋاپتى. ويتكەنى، قازاقستاننىڭ ءرولى - ورتالىق ازياداعى تەڭدەستىرىلگەن الەۋمەتتىك- ەكونوميكالىق جاعدايعا جاردەمدەسۋ. مەنىڭشە، قازاقستان وڭىردەگى الەۋمەتتىك- ەكونوميكالىق تەپە- تەڭدىككە عانا ەمەس، كەيبىر گەوساياسي اسپەكتىلەرگە دە جاردەمدەسە الادى»، - دەيدى ول.
تيبەريو گراتسياني استانا سوڭعى 20 جىل ىشىندە بەيبىتشىلىك پەن وركەنيەتتەر ديالوگىنا ارنالعان فورۋمداردىڭ بەسىگى ەكەنىن، سونداي- اق الەمدىك قوعامداستىقتىڭ نازارىن يادرولىق بەيتاراپتىق پروبلەماسىنا اۋداراتىنىندىعىنا توقتالىپ ءوتتى.
Vision Global Trends تالداۋ ورتالىعىنىڭ ءتوراعاسى «ءبىر بەلدەۋ، ءبىر جول» باستاماسىنا قىزىعۋشىلىقتىڭ ارتۋى، قازاقستاننىڭ وعان قاتىسۋى جانە ەۋروپانىڭ ودان قانداي پايدا كورەتىنى تۋرالى سۇراققا جاۋاپ بەرە وتىرىپ، باستاما شەڭبەرىندەگى ورتامەرزىمدى ىنتىماقتاستىقتىڭ پەرسپەكتيۆالى ەكەنىن ايتتى.