پرەزيدەنت قاسىم-جومارت توقايەۆ استانا حالىقارالىق فورۋمىنىڭ پلەنارلىق سەسسياسىنا قاتىستى
سونداي-اق كليماتتىڭ وزگەرۋى، ازىق-تۇلىك تاپشىلىعى جانە ەنەرگەتيكالىق قاۋىپسىزدىك سەكىلدى تۇيتكىلدەردىڭ شەشۋ جولدارىن ەگجەي-تەگجەيلى قاراستىردى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
جيىندا پرەزيدەنت قاسىم-جومارت توقايەۆپەن قاتار قىرعىزستان پرەزيدەنتى سادىر جاپاروۆ، بوسنيا جانە گەرتسەگوۆينا پرەزيديۋمنىڭ ءتوراعاسى جەلكا تسۆيانوۆيچ، وزبەكستان پرەمەر-ءمينيسترى ابدۋللا اريپوۆ، يۋنەسكو باس ديرەكتورى ودرە ازۋلە، حۆق باسقارۋشى ديرەكتورى كريستالينا گەورگيەۆا، ە ق ى ۇ باس حاتشىسى حەلگا شميد جانە ب ۇ ۇ باس حاتشىسىنىڭ ورىنباسارى - ەسكاتو ۇيىمىنىڭ اتقارۋشى ديرەكتورى ارميدا سالسيا اليسدجابانا ءسوز سويلەدى. ب ۇ ۇ باس حاتشىسى انتونيۋ گۋتتەريش فورۋم قاتىسۋشىلارىنا ۆيدەوۇندەۋ جولدادى. پلەنارلىق وتىرىستى بەلگىلى CNN جۋرناليستى ريچارد كۆەست جۇرگىزىپ وتىردى.
فورۋم قاتىسۋشالارى الدىندا ءسوز سويلەگەن مەملەكەت باسشىسى وسى جيىنعا قاتىسۋ ءۇشىن ەلىمىزگە ارنايى كەلگەن قاتار امىرىنە، قىرعىزستان پرەزيدەنتىنە، بوسنيا جانە گەرتسەگوۆينا پرەزيديۋمىنىڭ ءتوراعاسىنا، وزبەكستان پرەمەر-مينيسترىنە ريزاشىلىعىن ءبىلدىردى.
پرەزيدەنت جاھاندىق ەكونوميكانىڭ قازىرگى جاي-كۇيى مەن وڭىرلىك ىنتىماقتاستىق ماسەلەلەرى جونىندە پىكىر الماسۋ ءۇشىن اتالعان فورۋمنىڭ ماڭىزى زور ەكەنىن اتاپ ءوتتى.
«بۇل - حالىقارالىق سەرىكتەستىكتىڭ شىنايى ءمان-ماڭىزىن ايقىندايتىن جولدىڭ ءبىرى. وسى فورۋمدى باستاي وتىرىپ، ستراتەگيالىق سەرىكتەسىمىز - بىرىككەن ۇلتتار ۇيىمىنا جانە ونىڭ ح ۆ ق، يۋنەسكو، ب ۇ ۇ د ب، د س ۇ، ەسكاتو سەكىلدى ۇيىمدارىنا، باسقا دا حالىقارالىق ينستيتۋتتارعا، سونداي-اق اقپاراتتىق ارىپتەسىمىز - CNN- گە شىنايى ريزاشىلىعىمدى بىلدىرۋگە رۇقسات ەتىڭىزدەر»، - دەدى مەملەكەت باسشىسى.
مەملەكەت باسشىسى بۇرىن-سوڭدى بولماعان گەوساياسي شيەلەنىس پەن قازىرگى زامان وركەنيەتىنىڭ سىن-قاتەرلەرىنە نازار اۋدارىپ، استانا حالىقارالىق فورۋمى ميسسياسىنىڭ بەس نەگىزگى مىندەتىنە توقتالدى. اتاپ ايتقاندا، الەمدەگى جاعدايدى اشىق تالقىلاۋ؛ نەگىزگى سىن- قاتەرلەر مەن داعدارىستى ايقىنداۋ؛ وسى سىن- قاتەرلەرگە ءوزارا ىنتىماقتاستىق رۋحىندا ديالوگ ارقىلى قارسى تۇرۋ؛ كوپجاقتى قاتىناستاردىڭ ورتاق مادەنيەتىن جاڭارتۋ جانە قالپىنا كەلتىرۋ؛ بەيبىتشىلىكتى، پروگرەسس پەن ىنتىماقتى جاقتايتىن داۋىستاردى كۇشەيتۋ فورۋمنىڭ نەگىزگى ميسسيالارىنىڭ قاتارىنا كىرەدى.
سونىمەن قاتار پرەزيدەنت بىرىككەن ۇلتتار ۇيىمى قۇرىلعان ساتتەن بەرى نەگىزى قالانعان الەمدىك تارتىپكە تونەتىن قاۋىپ-قاتەرلەر تۋرالى ايتتى. بۇل رەتتە قاسىم-جومارت توقايەۆ ب ۇ ۇ بىردەن-ءبىر جاھاندىق امبەباپ ۇيىم بولىپ قالا بەرەتىنىن ءارى بۇل ۇيىم بارشا ادامزات بالاسىنىڭ مۇددەسى مەن شىنايى مۇقتاجدىقتارىنا قىزمەت ەتەتىنىن ايرىقشا اتاپ ءوتتى.
پرەزيدەنت ءوز سوزىندە الەمدەگى جاڭا داعدارىستىڭ ىقپالىنا قاتىستى وي-پىكىرىن ءبولىستى.
«COVID-19-دان باستاپ قارۋلى قاقتىعىستارعا دەيىنگى سوڭعى «جاڭا داعدارىستار» نازىك حالىقارالىق ەكوجۇيەگە قاۋىپ توندىرەدى. ءبىراق بۇل تۇراقسىزدىقتىڭ تۇپكى سەبەبى تەرەڭدە جاتىر. سونىمەن قاتار ءبىز 30 جىلدان كەيىن «بلوكتارعا» بولىنەتىن ەسكى كوزقاراستارعا قايتا ورالۋ جاعدايىنا كۋا بولىپ وتىرمىز. تەك گەوساياسي كۇش بىزدەردى جىككە ءبولىپ جاتقان جوق. ونىڭ ەكونوميكالىق استارى دا بار. ەكونوميكالىق ساياسات قارۋ رەتىندە اشىق قولدانىلۋدا. بۇل قاراما- قايشىلىقتار سانكتسيالار مەن ساۋدا سوعىستارىن، ماقساتتى بورىشكەرلىك ساياساتتى، قارجىلاندىرۋ كوزدەرىنەن شەكتەۋدى نەمەسە جويۋدى، سونداي-اق ينۆەستيتسيانى باقىلاۋدى قامتيدى»، - دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، گەوساياسي قيىندىقتارعا قاراماستان، قازاقستان سەنىمدى ساۋدا- ەكونوميكالىق سەرىكتەس رەتىندە ورتالىق ازيانىڭ ەكونوميكالىق لوكوموتيۆى ءرولىن اتقارىپ وتىر.
ءسوز سوڭىندا قاسىم-جومارت توقايەۆ فورۋم ورتاق ماسەلەلەردى شەشۋگە، سونداي-اق ارىپتەستىكتى، دامۋ مەن پروگرەستى ىلگەرىلەتۋگە ءوز ۇلەسىن قوساتىنىنا سەنىم ءبىلدىرىپ، جيىنعا قاتىسۋشىلارعا تابىس تىلەدى.