بەيجىڭ ەكسپورت كورسەتكىشى اقپاننان بەرى تەك كەرى قاراي قۇلدىراعانىن مالىمدەدى

None
استانا. قازاقپارات - دۇنيەجۇزىلىك بانك ساراپشىلارى جاھاندىق ەكونوميكاعا قاتىستى بولجامىمەن ءبولىستى. ولاردىڭ پايىمىنشا 2023 -جىلى ەكونوميكالىق ءوسىم باياۋلايدى. اسىرەسە، بۇل دامۋشى ەلدەردىڭ قارجى سالاسىنا قاتتى سوققى بولۋى مۇمكىن. تاۋەكەل ايماعىندا تۇركيا مەن قىتاي نارىعى بار.

تۇرىك ليراسى 2021 -جىلعى تاريحي قۇلدىراۋىن تاعى قايتالادى. كۇندىزگى ساتىلىمدا رەكوردتىق دەڭگەي - %7- عا ارزاندادى. قازىر ءبىر دوللارعا شاققانداعى باعامى - 23 ليراعا تەڭ. قايتا سايلانعان پرەزيدەنت رەجەپ تايپ ەردوعان وتكەن دەمالىس كۇندەرى مينيستەرلەر كابينەتىن جاساقتاپ، ليرانىڭ قۇنىن قالپىنا كەلتىرۋ ءۇشىن قارجى ءمينيسترى ورنىنا بۇرىنعى ۆيتسە- پرەمەر مەحمەت سيمشەكتى تاعايىندادى. ءوزىن پايىزدىق مولشەرلەمە «جاۋى» دەپ اتايتىن ەردوعان ورتالىق بانكتىڭ ديسكونتتاۋ مولشەرلەمەسىن وسىدان 2 جىل بۇرىن 19-دان % 8,5- عا دەيىن تومەندەتكەن ەدى. بۇل 2021 -جىلدىڭ جەلتوقسانىندا ليرانىڭ رەكوردتىق داعدارىسىن تۋعىزدى. ەندى ەل ۇكىمەتى %85- دان اسىپ تۇسكەن ينفلياتسيامەن كۇرەسۋگە ءماجبۇر.

ەكونوميكالىق احۋال قىتاي نارىعىندا دا بايقالادى. رەسمي بەيجىڭ ەكسپورت كورسەتكىشى اقپاننان بەرى تەك كەرى قاراي قۇلدىراعانىن مالىمدەدى. ماسەلەن، وتكەن ايدا ەل ەكسپورتىنىڭ كولەمى ءبىر جىلعى بۇرىنعى سايكەس كەزەڭمەن سالىستىرعاندا بىردەن % 7,5- عا تومەندەدى. الەمدىك ينفلياتسيا، ا ق ش- پەن قاتىناستىڭ ناشارلاۋى قىتاي ونىمدەرىنە سۇرانىستى السىرەتتى. بۇل ءوز كەزەگىندە ەلدەگى وندىرىستىك بەلسەندىلىكتى تومەندەتتى. ناتيجەسىندە كومپارتيا ەلدىڭ ەڭ ءىرى بانكتەرىنە ەكونوميكانى قولداۋ ءۇشىن دەپوزيت مولشەرلەمەسىن تومەندەتۋ تۋرالى ءوتىنىش جاسادى. الايدا الەم ەلدەرىنىڭ قىتاي تاۋارىنا دەگەن سۇرانىسى ارتا ما، بەلگىسىز.

بۇل رەتتە دۇنيەجۇزىلىك بانك ساراپشىلارى جاھاندىق ەكونوميكاعا قاتىستى اقپاراتپەن ءبولىستى. بولجام كوڭىل كونشىتپەيدى. بيىل الەمدىك ەكونوميكا ءوسىمى 2,1 پايىزعا دەيىن كۇرت باياۋلايدى. پايىزدىق مولشەرلەمەنىڭ ءوسۋى دامۋشى ەلدەر ەكونوميكاسىن تاۋەكەل ايماعىنا تۇسىرەدى. ال بۇل دامۋشى ەلدەردى جاڭا كۇيزەلىس جاعدايىندا ودان دا وسال ەتە تۇسەدى.

www.24.kz

سوڭعى جاڭالىقتار