كاسپي تەڭىزىنىڭ تارتىلۋى مۇمكىن بە - ەكولوگيا ءمينيسترى جاۋاپ بەردى
«قازىر ءتاتتى ءۇمىت بەرگىم كەلمەيدى. وكىنىشكە وراي، كاسپي تەڭىزىنىڭ ەكوجۇيە رەتىندەگى قازىرگى جاعدايى وتە كۇردەلى. ءبىرقاتار قىسىم فاكتورلارى بار»، - دەدى مينيستر «استانا حالىقارالىق فورۋمىنىڭ» كۋلۋارىندا.
بىرىنشىدەن، مينيستر جايىق پەن ەدىلدى قوسا العاندا، وزەندەر اعىسى تومەندەگەنىن اتاپ ءوتتى. ويتكەنى كاسپي تەڭىزى جابىق سۋ ايدىنى جانە وزەندەردەن تۇراقتى سۋ بولماسا، تارتىلىپ قالۋى مۇمكىن.
«ءار سۋ ايدىنىن قورەكتەندىرىپ تۇرۋ كەرەك. قازىر كاسپيگە قۇياتىن وزەندەردىڭ جاي- كۇيىن كورىپ وتىرمىز جانە كەز كەلگەن ازايۋ، وزگەرىس، رەتتەۋلەر تىكەلەي اسەر ەتەدى. ەكىنشى ماسەلە - كليماتتىڭ وزگەرۋى. بۇل وزەندەردىڭ گيدرولوگيالىق رەجيمدەرىنە اسەر ەتەدى. سوڭعى بىرنەشە جىلدا ءبىز سۋدىڭ تارتىلا تۇسكەنىن بايقاۋدامىز. كاسپي تەڭىزىنىڭ قازاقستاندىق بولىگى ەڭ تاياز بولىپ سانالادى، سوندىقتان ءبىز سىرتقى ەكزوگەندىك فاكتور رەتىندە كليماتتى وزگەرۋى مەن رەتتەۋ قىزمەتىنىڭ سالدارىن ءبىرىنشى بولىپ كورىپ وتىرمىز. سوندىقتان، وكىنىشكە وراي، پروبلەما بار»، - دەپ مويىندادى ەكولوگيا ءمينيسترى.
ءزۇلفيا سۇلەيمەنوۆا بۇل ماسەلە كاسپي ماڭى ەلدەرىندەگى ارىپتەستەرى اراسىندا كوتەرىلىپ جاتقانىن ايتتى. ءبىراق ماسەلە تۋرالى تەك قانا ايتۋ جەتكىلىكسىز، ءتيىمدى شارالار دا قابىلدانۋى كەرەك.
«بۇل ماسەلەلەردى شەشپەي، بارلىق كاسپي ماڭى مەملەكەتتەرىنىڭ پارمەندى شارالارىنسىز ساقتاۋ تۋرالى ايتۋ وتە قيىن بولادى»، - دەپ قورىتىندىلادى ول.