نازاربايەۆ ۋنيۆەرسيتەتىنە جاڭا باسشى كەلگەن سوڭ قارجىلىق قىزمەتىنە اناليز جاسالادى
«قازىرگى تاڭدا تەك قانا ءبىر وزگەرىس بار. نازاربايەۆ ۋنيۆەرسيتەتى تۋرالى زاڭ وزگەرىپ جاتىر. ۇكىمەتتىڭ، ءبىزدىڭ مينيسترلىكتىڭ نەگىزگى ماقساتى - ۋنيۆەرسيتەتتىڭ الەۋەتىن ساقتاپ قالۋ جانە ونى مىقتى زەرتتەۋ دەڭگەيىنە شىعارۋ. نەگىزگى باسىم جوسپارىمىز - زەرتتەۋ الەۋەتىن كوتەرۋ. نازاربايەۆ ۋنيۆەرسيتەتىندە وتە مىقتى توعىز زەرتحانا بار. ەڭ مىقتى پروفەسسورلار، وقىتۋشىلار شوعىرلانعان. ماقالا تۇرعىسىنان، عىلىمي پۋبليكاتسيا تۇرعىسىنان ەڭ ءبىرىنشى دەڭگەيدە تۇر. ءبىراق قولدانبالى، سالالىق زەرتتەۋلەر ازداۋ. شىنى كەرەك ۇلتتىق كومپانيالارىمىزعا، سالالىق كومپانيالارىمىزعا، وندىرىسكە قولدانبالى ۇلەسى ءالى ازداۋ»، - دەدى مينيستر.
ونىڭ سوزىنشە، ۋنيۆەرسيتەتتى قارجىلاندىرۋ ءتارتىبى سول كۇيىندە قالادى.
«اۆتونومدىق قۇقىعى شەكتەلمەيدى. ويتكەنى جينالىپ قالعان پوتەنتسيالدى شايقاپ، توگىپ الماۋىمىز كەرەك. قالىپتاسقان كادرلاردى، سول جەرگە قۇيىلعان اقشانىڭ ارقاسىندا پايدا بولعان مىقتى زەرتحانالاردى توگىپ الماۋىمىز. قارجىلاندىرۋ ءتارتىبى سول كۇيىندە ساقتالادى. ءبىراق قازىر اناليزىن جاساۋىمىز كەرەك. سول اناليزدىڭ قورىتىندىسىنا قاراي كورەمىز. بىلەسىزدەر، باسشىلىعى اۋىسادى. ۇلكەن كونكۋرس جاريالانادى. سول كونكۋرس نەگىزىندە عانا باسشىلىق تاعايىندالىپ، سودان كەيىن اناليز جاسالادى»، - دەدى ساياسات نۇربەك.
اۆتور:
ەسىمجان ناقتىباي