پرەزيدەنت حالىقارالىق ۆاليۋتا قورىنىڭ باسقارۋشى ديرەكتورىن قابىلدادى
پرەزيدەنت قاسىم- جومارت توقايەۆ كريستالينا گەورگييەۆاعا ءىلتيپات بىلدىرە وتىرىپ، حالىقارالىق ۆاليۋتا قورىمەن 30 جىل بويى جالعاسىپ كەلە جاتقان تابىستى ىنتىماقتاستىققا كوڭىلى تولاتىنىن جەتكىزدى.
«قورمەن اراداعى ىنتىماقتاستىعىمىز تابىستى جۇزەگە اسىپ كەلەدى جانە ول الداعى ۋاقىتتا دا جالعاسادى. قوردان تۇراقتى كەڭەس الۋ مۇمكىندىگى ءۇشىن ريزاشىلىعىمدى بىلدىرەمىن. ءسىزدىڭ قازاقستان ەكونوميكاسىنىڭ دامۋىنا قوسقان ۇلەسىڭىز ەلەۋلى ەكەنى انىق»، - دەدى مەملەكەت باسشىسى.
كەزدەسۋ بارىسىندا پرەزيدەنتكە حالىقارالىق ۆاليۋتا قورىنىڭ قازاقستانعا قاتىستى جوسپارلارى جونىندە مالىمەت بەرىلدى.
مەملەكەت باسشىسى الماتى قالاسىندا الەۋەتتى دامىتۋ جونىندەگى وڭىرلىك ورتالىق اشۋ تۋرالى قوردىڭ باستاماسىن قولدايتىنىن اتاپ ءوتىپ، ونىڭ قازاقستان مەن ورتالىق ازياداعى قارجى جۇيەسىنىڭ تۇراقتىلىعىنا زور ۇلەس قوساتىنىنا سەنىم ءبىلدىردى.
كريستالينا گەورگيەۆا استانا حالىقارالىق فورۋمىنا شاقىرتۋ العانى ءۇشىن العىس ايتتى. «الەمدىك ەكونوميكادا بەلگىسىزدىك بەلەڭ العان شاقتا استانا حالىقارالىق فورۋمىنا قاتىسىپ وتىرعانىما قۋانىشتىمىن. الەمدەگى باعىت- باعدارىمىزدى ايقىنداۋ ءۇشىن وسىنداي ديالوگ الاڭدارىنىڭ بولۋى وتە ماڭىزدى. ەڭ الدىمەن، ءسىزدىڭ ەلىڭىزدە بولعان اۋقىمدى وزگەرىستەردى ايرىقشا اتاپ وتكىم كەلەدى»، - دەدى ح ۆ ق باسشىسى.
